ПАЯН православи тĕнне ĕненекенсем çветтуй Валентин кунне паллă тăваççĕ. Вăл священник пулнă. Чиркỹ настоятельне темиçе ĕмĕр каяллах, Рим императорĕ вăхăтĕнчех пăхăнманшăн суд тунă. Каярахпа, февралĕн 14-мĕшĕнче ăна çветтуйсен шутне кĕртнĕ. Ун хыççăн вара юратакансем ăна хăйсен хỹтĕлевçи тесе йышăннă, пĕр-пĕрне юратуллă çырусем панă.

Юлашки çулсенче уйрăмах шкул ачисем, студентсем, çамрăксем, пĕр-пĕрне кăмăллакансем, ырă сунакансем пĕчĕк чĕреллĕ открыткăсем парнелеççĕ. Паянхи кун ăна унчченхи евĕр алăран çеç тыттармаççĕ, социаллă сетьсенче СМС-кăсем вĕçтереççĕ, тĕрлĕрен видеопа пĕр-пĕрне савăнтараççĕ. Кирек мĕнле пулсан та чи пĕлтерĕшли - чун савнисене сăмахпа каласа ăшшăн çупăрлани. Эсир вара юратнă çыннăрсене çапла тума манмарăр-и?