Çулсем пĕрин хыççăн тепри пĕр-пĕрне улăштарса пырсан та Афганистанра пулнă салтаксен чунĕсенчи суран паян та хăйĕн пирки аса илтерсех тăрать. Çакна февралĕн 15-мĕшĕнче Совет çарĕсене Афганистанран илсе тухнăранпа 34 çул çитнине халалланă мероприяти умĕн Патăрьел муниципалитет округĕн пуçлăхĕпе Рудольф Селивановпа тата Чăваш Республикин Патшалăх Канашĕн депутачĕпе Валерий Антоновпа тĕл пулнă чухне те палăртрĕç. Вĕсем пурнăçпа вилĕм хушшинче çỹренĕ кунсене аса илчĕç, Тăван çĕршыва хỹтĕлеме ят тухсан паян та салтак аттине тăхăнма хирĕç маррине палăртрĕç. Украинăри ятарлă çар операцине хутшăнакансем чăн-чăн паттăрсем пулнине, вĕсене таврăнсассăн хăйсен хỹттине илме кăмăл тунине каларĕç.

Патăрьел муниципалитет округĕн пуçлăхĕ Рудольф Селиванов калаçура афганецсене çитĕнекен ăрăва патриотла воспитани парассине тимлĕх уйăрнăшăн, шкулта вĕренекенсемпе, студентсемпе тĕл пулусем йĕркеленĕшĕн тав турĕ. Çавăн пекех Чăваш Республикин Патшалăх Канашĕн депутачĕ Валерий Антонов та ачасене Афган вăрçи пирки ытларах каласа памаллине, çапла майпа çеç вĕсене историпе тĕплĕнрех паллаштарма, чăн-чăн çын туса ỹстерме май пуррине пĕлтерчĕ. Унтан пурте пĕрле Патăрьел тата Шăмăршă районĕсен çар комиссариачĕ умне вырнаçтарнă танк-палăк умĕнче çуллен йĕркелекен митинга хутшăнчĕç.

Патăрьел муниципалитет пуçлăхĕ Рудольф Селиванов сăмах илнĕ май салтак тивĕçне чун-чĕререн пурнăçланă афганецсем çамрăксемшĕн яланах тĕслĕх пулнине каларĕ, çирĕп сывлăх, вăрăм ĕмĕр сунчĕ. Ют çĕршывра паттăрла вилнисене асра тытнине, вĕсен тăванĕсем умĕнче пуç тайнине пĕлтерчĕ. Обществăлла ĕçре палăрнисене Патăрьел муниципалитет округĕн Тав çырăвĕпе чысларĕ. Ĕнерхи салтаксем ĕмĕрлĕхех çамрăк тăрса юлнă 7 ентеше сума суса танк-палăк умне гирлянда тата чĕрĕ чечексем хучĕç, пĕр самант шăп тăчĕç.

О. ПАВЛОВА