"Авангард" хаçатăн пĕрремĕш номерĕ кун çути курнăранпа нумай пулмасть çеç 92 çул пулчĕ. Çак сахал мар тапхăрта унăн çĕршер çеç мар, пиншер вулакан, тус-юлташ пулнă, пур, пулĕ те. "Чун апачĕ" паянхи кун та Патăрьел муниципалитет округĕпе 4 пин ытла çемьене саланать.

Паттăр енсен çĕнĕ хыпар-хăнарĕпе Шупашкарта çеç мар, кỹршĕ районсенчи вулакансем те паллашсах тăраççĕ, ăна кашни çур çултах çырăнса илеççĕ. Акă, Шăмăршăра пурăнакан Иван Медведев почтальонсем эрнере икĕ хут илсе килсе паракан хаçат-журнала кăмăлтан, чун-чĕререн кĕтет. Вĕсенчен вара чăн малтанах Патăрьелсен "Авангардне" алла илет. Сăмах май каласан, тăван хаçат Иван Ананьевичшăн ют мар. Вăл çамрăк чухнех район хыпарçипе тачă çыхăну тытнă. Тивĕçлĕ канăва тухнă журналист ("Шăмăршă хыпарĕ" хаçатра 22 çул ĕçленĕ) паянхи кун та пирĕн хаçат страницинче хăйĕн тарăн шухăшлă калавĕсене пичетлет.