Пăлапуç Пашьелĕнчи вăтам шкулта Хĕрлĕ Çăлтăр орденĕн тата «Паттăрлăхшăн» медалĕн кавалерне, Афган вăрçинче пуçне хунă Сителти Александр Журавлева асăнса волейбол турнирĕ иртрĕ. Кăçалхипе  29-мĕш хут йĕркеленĕ мероприятие яланхи пекех халăх йышлă пуçтарăнчĕ.

Ăмăртăва хутшăнакансене Патăрьел муниципалитет округĕн пуçлăхĕн пĕрремĕш çумĕ Николай Раськин, Пăлапуç Пашьел территори пайĕн начальник.  Владимир Никитин, Чăваш Республикин Патшалăх Канашĕн депутачĕ Олег Мешков, Патăрьел тата Шăмăршă районĕсен çар комиссарĕ Евгений Семенов, республикăри афганец-ветерансен общество организацийĕн ертÿçи Игорь Кашаев, Пăлапуç Пашьел вăтам шкул директорĕ Сергей Матюшкин, Афган вăрçинче Сашăпа пĕрле пулнă Сергей Кузьмичев тата ытти юлташĕсем, Александр Журавлевăн амăшĕ Роза Николаевна ăнăçу сунчĕç.

Сăмах май каласан, çак турнирăн ячĕ-сумне çĕклессишĕн Сергей Кузьмичев çулленех ырми-канми тăрăшать, ăна йĕркелессине хăйĕн тивĕçĕ  вырăннех хурать. «Сашăпа шкулта та пĕр класра вĕрентĕмĕр, Сĕнтĕрвăрринчи вăрман техникумĕнче те юнашарах пĕлĕве малалла тăсрăмăр. Çар тивĕçне те пĕрлех пурнăçларăмăр. Шел, çывăх юлташăм пĕр çапăçура вилмеллех аманчĕ. Çавна май пирĕн Саша пек паттăрсене манăçа кăларас марччĕ», _ терĕ Сергей Николаевич тусне аса илнĕ май.

Турнира хутшăннă командăсенчен хĕрарăмсен ушкăнĕнче Первомайски территори пайĕн спортсменĕсем мала тухрĕç. Пăлапуç Пашьелĕнчи вăтам шкулта вĕренекен хĕрсемпе ял пикисем иккĕмĕшпе виççĕмĕш вырăнсене пайларĕç. Арçынсенчен Комсомольски округĕнчи Шурут çамрăкĕсене çитекенни пулмарĕ. Сителсем – иккĕмĕш, Пăлапуç Пашьелсем – виççĕмĕш. Мала тухнă командăсене кубоксемпе, медальсемпе чысларĕç.

Асăну турнирне Пăлапуç Пашьелĕнчи вăтам шкулта вĕренекенсем хăйсен юрри-ташшипе пуянлатрĕç.

А. Иванов