Пĕтĕм тĕнчери хĕрарăмсен кунĕнче Еншик ялĕнчи хисеплĕ ĕç тата спорт ветеранĕ, 92 çулта пыракан Николай Урмаков ячĕпе йĕлтĕр ăмăртăвĕ иртрĕ. Унта Кĕçĕн Арапуç, Хирти Пикшик, Тикеш ялĕсенчи спорта кăмăллакансем хутшăнчĕç. Старта 60а яхăн çын тăчĕ.

 Ăмăртăва уçнă çĕре Пикшик территори уйрăмĕн начальникĕ В. Краснов, Еншикри хисеплĕ педагог-ветеран П. Маслов, Н. Урмаковăн ывăлĕ Федор Николаевич хутшăнчĕç, пурне те сывлăх, ăнăçу сунчĕç. Йĕлтĕр йĕрĕ çине чăн малтанах кĕçĕн класра вĕренекенсем тăчĕç, хăйсен хастарлăхĕпе, пултарулăхĕпе савăнтарчĕç. Вĕсем хыççăн тĕрлĕ ушкăнри ачасем, аслисем, ваттисем ăмăрту дистанцине парăнтарчĕç.

Хăйсен çулĕсенче Кĕçĕн Арапуçĕнчи Матвей Иванкин, Еншикри Софья Мефодьева, Карина Сурнаева, Тимофей Краснов, Артем Ильбеков, Диана Иванкина, Максим Иванкин, Николай Григорьев, Тикешри Александр Кузьмин, чи аслисенчен вара вуннăмĕш теçеткере пыракан Николай Урмаков малти вырăнсене йышăнчĕç, диплома тата парнесене тивĕçрĕç.

Спорт уявĕ питĕ кăмăллă иртрĕ.

Н. КРАСНОВ