Тутар Сăкăтĕнчи культура çуртĕнче "Мини-мисс çуркунне-2023" ятпа уяв каçĕ иртнĕ. Чипер тăхăннă конкурсантсем хумханни палăрать. Вĕсене ашшĕ- амăшĕ, аслашшĕ- асламăшĕ хавхалантарма килни савăнтарать те.

Мероприяти конкурс евĕр иртрĕ. 8-9 çулсенчи чиперккесем "Мини-мисс çуркунне-2023" ята илессишĕн тупăшрĕç. Хăйсен юрлас, ташлас, сăвă вулас пултарулăхне кăтартрĕç. Сумлă жюри - Тутарстан Республикин тава тивĕçлĕ артисчĕ, Комсомольскинчи ачасен ăсталăх шкулĕн преподавателĕ Илдус Шайдуллин, Патăрьел муниципалитет округĕнчи "Единая Россия" партин вырăнти уйрăмĕн ĕç тăвакан секретарĕ Алсу Шакирова, ялти ача сачĕн воспитателĕ Гельфруз Салихова - вĕсен пултарулăхне хакларĕ.

Сцена çинче конкурсантсем хăйсене тытма пĕлни пурне те килĕшрĕ. Кашнийĕ хăйĕнпе туллин паллаштарчĕ. Тумĕсем те килĕшỹллĕ пулчĕç. Камила Козлова "Сăпайлă çамрăк-мисс", Дина Хафизова "Çыпăçуллă çамрăк-мисс", Адиля Гайнуллова "Илемлĕ çамрăк-мисс", Лилия Айзатуллова "Креативлă çамрăк-мисс", Гелия Незметдинова "Талантлă çамрăк-мисс", София Козлова "2-мĕш вице мини-мисс", Азалия Ахметова "1-мĕш вице мини-мисс" ята тивĕçрĕç.

"Мини-мисс çуркунне-2023" ята вара Азалия Валиуллова çĕнсе илчĕ.

Хаклав

Рамиля НЕЗМЕТДИНОВА, ялти культура çурчĕн ĕçченĕ:

- "Культура" наци проекчĕ пурнăçа кĕрсе пыни савăнтарать. Мероприятисене интереслĕ ирттерме тăрăшни культура çуртне халăха утма май парать. Ан тив, ку хутĕнче сцена çинче кĕçĕннисем пулчĕç. Вĕсене курма вара çамрăксем те, аслисем те килнĕ. Тепринче çитĕннисен пултарулăхне курса хаклама май пултăр. Çавă çеç.

Альбина КАПИТОНОВА