"Демографи" наци проекчĕн тытăмĕнчи "Спорт - пурнăç йĕрки" проектăн тĕллевĕ хăйсен сывлăхне упракан граждансен йышне спортпа ытларах туслаштарса ỹстересси пулса тăрать. Çакна çамрăкки те, асли те вырăна хума тăрăшни хавхалантарать. Кзыл Чишма территори пайĕнчи "Сэлэт-Батыр" обществăлла центрта шашка-шахматла выляса нумай хутчен район чемпионĕ пулнă Мансур Абдуллина асра тытса регионсем хушшинчи турнир иртрĕ. Унта хутшăнакансене Патăрьел муниципалитет округĕн пуçлăхĕ Рудольф Селиванов саламларĕ.

Малтанах шахмат ăстисем выляма пуçларĕç. Нумай хутчен республика шайĕнче çĕнтерỹçĕ пулнă Вăрнар поселокĕнчи Валерий Наумов хастарлăх кăтартрĕ. Патăрьелĕнчи Владислав Антоновпа Николай Гранатский те маçтăрлăхне ỹстерсех пыраççĕ. 88 çулхи Памир Салихов та ыттисенчен юласшăн мар. Çĕнтерỹçĕ вара Николай Гранатский пулчĕ. Иккĕмĕш вырăнта - Патăрьелĕнчи Владимир Суйманов. Виççĕмĕшне Владислав Антонов тухрĕ.

Шахматри евĕрех шашка турнирне те 14 спортсмен хутшăнчĕ. Вăрнар поселокĕнчи Валерий Наумовпа Комсомольски ялĕнчи Индюков, спорт мастерĕн кандидачĕ Владислав Антоновпа Николай Федоров пĕрремĕш вырăншăн тупăшрĕç. Çĕнтерỹçĕ Владислав Антонов пулчĕ. Иккĕмĕшĕнче - Валерий Наумов.

Марс АБДУЛЛИН