Мухтав орденĕн тулли кавалерĕ, Тăван çĕршывăн Аслă вăрçин ветеранĕ Порфирий Герасимович Кариков полковник (25.03.1923-17.09.2003) 100 çул каялла Сăкăтра çуралнă.

Порфирий Кариков Сăкăтри 7 класлă тата Шăнкăртамри вăтам шкултан вĕренсе тухнă хыççăн механизатор профессине алла илнĕ. 1941 çулхи кĕркунне вăрçа кайнă. 1942 çултан разведчик пулса çапăçнă. Вăрçă хыççăн Çар академинче вĕреннĕ, Хĕç-пăшаллă вăйсенче службине малалла тăснă. 1975-1977 çулсенче Сиринче çар советникĕ пулнă. Отставкăна каяс умĕн дивизи командирĕн çумĕ пулса ĕçленĕ. Канăва тухсан Одессăра, 1998 çултан Витебскра пурăннă.

Пирĕн ентешĕмĕр I, II, III степень Мухтав орденĕсене, Хĕрлĕ Ялав, Хĕрлĕ Çăлтăр, I степень Тăван çĕршывăн Аслă вăрçин орденĕсене тата медальсене тивĕçнĕ. Унăн ячĕпе тăван ялĕнчи пĕр урам хисепленсе тăрать.

Çăмăл атлетика енĕпе 1-мĕш разрядлă спортсмен Рассых Фахрутдинович Бикчурин (27.03.1928-19.05.1991) 95 çул каялла Шăнкăртамра çуралнă.

Рассых Бикчурин 800, 1500, 5000, 10000 метрсене чупассипе 44 хутчен республика рекордне çĕнетнĕ. 1949-1959 çулсенче ялта пурăнакан спортсменсем хушшинче çăмăл атлетика енĕпе нумай хутчен СССР тата РСФСР чемпионĕ, призерĕ пулнă. 1951 çулта вара 800 метра чупса Чăваш Ен спортсменĕсем хушшинче чи малтан Раççей чемпионĕ ята тивĕçнĕ. Вăл Шăнкăртамри Жданов ячĕллĕ колхозра физкультура инструкторĕ пулса ĕçленĕ.

 ("Çулталăк кĕнекинчен")