ИРТНИСĔР малашлăх çук, тенĕ ваттисем. Пурнăç çĕнелсе, аталанса пынă май халăхăн историйĕ, йăли-йĕрки, йăх-несĕлĕмĕрсен культури çулсеренех хыçран-хыçа юлса пырать. Çавна май тĕнчипе палăрнă Геннадий Айхи поэтăмăрăн çĕршывĕнче, Çĕньял территори пайне кĕрекен Анат Тăрмăш клубĕнче аваллăха аса илтерекен культура вучахĕнчен ретро-клуб йĕркелесе ярасшăн.

 Патăрьел муниципалитет округĕн культура, туризм тата информаци тивĕçтерĕвĕн пай начальникĕ Наталия Никитина хаçат редакцине пĕлтернĕ тăрăх, культура учрежденийĕнче 50-60-мĕш çулсенчи ял пурнăçне, культурине сăнлакан сăн ỹкерчĕксем, афишăсем, çынсен çи-пуçне, ĕçне аса илтерекен тумсем, кăсăклă алă ĕçĕсем тата ытти те вырăн тупмалла. Кунтах ташă каçĕсем те ытларах ĕлĕкхилле, купăспа кĕрлемелле, тĕрлĕрен фестиваль, кăсăклă каçсем иртмелле тата ытти те. Урăхла каласан, муниципалитет округĕн шайĕнче йĕркелекен çак "вучах" пирĕн тăрăха килекен хăнасемшĕн, туристсемшĕн те кăсăклă пулмалла. Хальхи вăхăтра сирĕн пулăшу, ырă сĕнỹ ретро-клуба капăрлатса ĕçлеттерсе яма çав тери пĕлтерĕшлĕ пулнине палăртрĕ Наталия Олеговна. Сирĕн çемье архивĕнче аваллăха аса илтерекен паха япаласем пулсан Патăрьелĕнчи культурăпа кану центрне çитерме пултаратăр.