Çĕрпỹ муниципалитет округĕнче Çĕпĕр мурĕпе чирленĕ икĕ çынна тупни пирки массăллă информаци хатĕрĕсем çийĕнчех пĕлтерчĕç. Выльăхшăн, пĕрлех этем сывлăхĕшĕн те хăрушлăх кăларакан чиртен хỹтĕленме тивĕçлĕ йышăнусем турĕç. Усал амакран сыхланма çăмăлтарах, çакна шута илсе Юхмапа Пăла тăрăхĕнче те ĕçлеме пуçланă. Кун пирки Патăрьел муниципалитет округĕнчи выльăх-чĕрлĕх чирĕсемпе кĕрешекен станци начальникĕ Петр Ефимов каласа пачĕ:

- Çĕпĕр мурĕнчен çулленех мероприятисен планĕпе килĕшỹллĕн вакцинаци тăватпăр. Выльăх-чĕрлĕхе сиплекенсем лашасене, ĕне-выльăха, сурăхсене вакцина тума пуçланă. Пĕрлех вĕсем çынсене асăннă чир пирки çырнисене (брошюрăсем) те парса хăвараççĕ. Çавăн пекех кафе, столовăй директорĕсемпе те пирĕн специалистсем, хам та тĕл пулса калаçнă. Тăмха (клеймо) тата ветеринари докуменчĕ пур аш-какая çеç туянмаллине тепĕр хут аса илтернĕ.

Выльăха пусса тирпейлекен цехсене те çитнĕ, предпринимательсемпе, ĕне, вăкăр, пăру пухса çỹрекенсемпе те тĕл пулнă. Ытларикунпа эрнекун Патăрьелĕнчи Юхма пасарĕнче тĕрĕслевсем ирттеретпĕр. Нумай пулмасть Турхана тата Первомайскине çитсе килтĕм, унта сурăхсемпе, сыснасемпе, чăх-чĕппе сутă тăвакансемпе курнăçрăм, асăрхуллă пулмалли пирки ăнлантарса патăм.

Пирĕн тăрăхра Çĕпĕр мурĕ алхаснă тĕслĕхсем пулнă. Асăннă амакпа чирленĕ выльăхсене пытарнă 7 масар пур. Вĕсене икĕ метрлă картапа тытса çавăрнă, этемшĕн хăрушлăх кăлармаççĕ.

Ольга ПАВЛОВА