ЮХМАПА Пăла тăрăхĕнчи сцена ăстисен коллективĕсем пĕринчен тепри пултаруллă, пысăк ăсталăхпа палăрса тăраççĕ. Тĕрĕссипе каласан, çак ырă пулăм Патăрьелсен унчченех пулнă.

Акă, кăçалхи март вĕçĕнче Çĕньял хастарĕсенчен йĕркеленĕ хор ушкăнĕ Мускаври Кремльти тĕп сцена çине чăваш халăх юррипе тухнăранпа 50 çул çитнĕ! Кăшт маларах çеç вĕсем ун умĕн Чулхуларан СССР 50 çул тултарнине халалланă сморт-конкурсран лауреат пулса таврăннă. Çĕршывăн тĕп хулинчи концертра 28 арçынпа хĕрарăм Юрий Антоновпа Юрий Тестов баянистсем тата Анатолий Шакин дирижер ертсе пынипе юрра темиçе сасăпа мăнаçлăн шăрантарнă. Культура пурнăçĕнче асра юлнă самант Çĕньялсене паянхи кун та хавхалантарать. Сăмах май каласан, çакнашкал пысăк çитĕнỹсене тĕпе хурса 1974 çулта Çĕньялсен пултарулăх ушкăнне "халăх хорĕ" ят панă. Ун хыççăн та коллектив республика, Раççей шайĕнчи культура мероприятийĕсене сахал мар хутшăннă, лауреат ята тивĕçнĕ.