ÇАК кунсенче Çĕнĕ Шупашкарти 3-мĕш спорт шкулĕнче çăмăл атлетсен "Мемориал В.Г.Надеждина" Пĕтĕм Раççейри йăлана кĕнĕ турнирĕ иртнĕ. Пысăк ăмăртăва Патăрьелĕнчи "Паттăр" ФСК çумĕнчи ачасемпе çамрăксен спорт шкулĕн спортсменĕсем те хутшăннă. Пирĕн çăмăл атлетсем ăмăртуран çитĕнỹпе таврăннă, тĕрлĕ дистанцие чупса пьедесталăн кашни картлашки çинех тăма тивĕçнĕ.

Первомайскинчи вăтам шкулти Александр Удаловпа Валерий Гаврилов 400 тата 800 метра чупса пĕрремĕш вырăн йышăннă. Çак шкулти Кристина Иванова 800 метрлă дистанцие парăнтарса финиша иккĕмĕш кĕнĕ. Пăлапуç Пашьелĕнчи вăтам шкулти Николай Соколов (1500 метр) пĕрремĕш, Евгений Камышев (1500) иккĕмĕш, Анастасия Бахитова (60) виççĕмĕш, Патăрьелĕнчи иккĕмĕш вăтам шкулти Кирилл Кабиков (1500) иккĕмĕш вырăнсенче. Александр Удаловпа Николай Соколов çак ăмăртура пĕрремĕш разряд нормине тултарни те питĕ кăмăллă хыпар!