Пурнăçри лару-тăру, çул-йĕр çинче пулакан аварисен пĕтĕмлетĕвĕ йĕрке хуралĕнче те çĕнĕ улшăнусене, çирĕпреххисене кĕртме хистет. Иртнĕ çултан пуçласа руль умне ỹсĕрле ларакан водительсемшĕн саккун тата ытларах кăраланчĕ. Малашне ĕçке пула темиçе миллион тенкĕ тăракан автомобильсĕр те тăрса юлма пулать. Çакăн пирки РФ ШĔМĕн муниципалитет округĕсем хушшинчи "Батыревский" урăмĕн ГИБДД пайĕн начальникĕн тивĕçĕсене вăхăтлăх пурнăçлакан Руслан Старшов акă мĕн пĕлтерчĕ:

 - Тĕрĕссипе каласан руль умне ỹсĕрле ларса çула тухакан водительшĕн саккунĕ ахаль те çирĕпчĕ. Вĕсен çулталăк çурăран пуçласа икĕ çул таранччен водитель прависĕр тăрса юлнисĕр пуçне пысăк штрафа та тỹлеме тиветчĕ. Апла пулин те теветкелленекенсем тăтăшах тупăнса тăраççĕ. Хăш-пĕр пуçтахсем иккĕмĕш хут çав йăнăшах тунисем те пур. Ỹсĕр водитель авари тунă тĕслĕх те тĕл пулать. Чи пăшăрхантараканни авари синкерлĕ вĕçленни, çыннăн пурнăçĕ татăлни.

 Ỹсĕрле е эрех ĕçнĕ хыççăн çула тухакан водительсене явап тыттарасси çирĕп пулнине пăхмасăрах иртнĕ çултан хăрушсăрлăх йĕркине тата ытларах пăхăнмалли саккун вăя кĕчĕ. Малашне эрех ĕçсе руль умне ларса çула тухни çав тери хака ларма пултарать. Çавнашкал водительсен автомобилĕсене çул çỹрев хăрушсăрлăхне хирĕç преступлени тунăшăн Уголовлă кодексăн 264.1статйин 1-пайĕпе, 104.1, 264.2, 264.3 статйисемпе айăплаççĕ, машинине конфискацилеççĕ, патшалăх харпăрлăхĕ валли туртса илеççĕ.

Конфискациленисен шутĕнче темĕн тĕрлĕ транспорт та пур. Самокатран пуçласа ют çĕршывра кăларнă 3-4 миллион тенкĕ тăракан "Тойота Лэнд Крузер Прадо" таранах! Апла пулсан водителĕн алла черкке тытиччен пуç тавра шутлама сăлтав пысăк! Çамка çине картмалăх та пур! Ку таранччен пирĕн муниципалитет округĕпе маларах асăннă статьясемпе автомашинисене патшалăх харпăрлăхĕ валли туртса илнĕ тĕслĕхсем çук. Республикипе вара сахал мар. Анчах та çакă малашне çул çинчи хăрушсăрлăх йĕркине пăхăнассине хавшатмаллине пĕлтермест. Хăвăрăн тата çула тухакан ытти çынсен сывлăхне, сыхлас тесен чăн малтан çул-йĕр хăрушсăрлăхĕпе çыхăннă саккунсене çирĕп пăхăнмалла.

 Альбина ЕГОРОВА калаçнă