Чăваш эстрада çăлтăрĕ Стас Владимиров шăрантаракан "Мĕн пурăннă таран хĕрарăма мухтар..." юрри хальхи вăхăтра кашни ача амăшне, хастар хĕрарăма лартнă "чĕрĕ палăк" тесе хаклас килет. Чăннипех те тивĕçлĕ вăл çакнашкал ăшă та асамлă сăмахсене! Шел пулин те чылай чухне хĕрарăмсем тĕрлĕ сăлтава пула хăйсен сăпайлăхне, именчĕклĕхне пула обществăра яриех уçăлаймаççĕ, пултарулăхне, хастарлăхне кăтартаймаççĕ. Икĕ çул каялла Чăваш Енри Хĕрарăмсен канашĕпе "Пĕрле" фонд "Эпĕ - хĕрарăм" ("Я- женщина") ятпа йĕркелесе янă конкурс шăпах пур енĕпе те ăста ача амăшĕсене çул паракан, вĕсен пултарулăхĕпе паллашма май параканскер. Акă мĕн пĕлтерчĕ республика шайĕнчи çак тупăшу пирки Патăрьел муниципалитет округĕнчи Хĕрарăмсен канашĕн ертỹçи Алена Горшкова: \

- "Эпĕ - хĕрарăм" конкурс республикăра 2021 çулта пĕрремĕш хут иртрĕ. Унăн условийĕпе килĕшỹллĕн тупăшура тĕрлĕ тытăмра палăрнă, тĕрлĕ сферăра тăрăшакан хĕрсемпе хĕрарăмсем хăйсен çемйи, профессийĕ, обществăри хастарлăхĕ, ыр кăмăллăх ĕçĕсене мĕнле хутшăннă пирки видеороликсем хатĕрлесе тăратнă. Конкурс малтанхи çулхинех пысăк хастарлăхпа иртрĕ. Кашни муниципалит округĕнченех мĕн пурĕ 350 хĕрарăм хапăл турĕ унта хутшăнма. Ун чухне Юхмапа Пăла тăрăхĕн чысне Патăрьелĕнчи тĕп больницăри Фирия Хафизова врач-гинеколог хỹтĕлерĕ, социаллă сферăри пултаруллă хĕрарăмсем хушшинче иккĕмĕш вырăн йышăнчĕ.

2022 çулта "Эпĕ-хĕрарăм" республика конкурсне тăваттăн хутшăнчĕç: Патăрьелĕнчи халăха социаллă хỹтлĕх паракан центрĕнчи Алена Петровăпа Людмила Дубинина уйрăм заведующийĕсем, "Вĕрентỹ" номинаципе Шăнкăртамри "Сандугач" ача сачĕн музыка ертỹçи Эльфиня Валеева тата "Сывлăх сыхлавĕ" номинаципе "Люкс-Оптика" тулли мар яваплă обществăн оптик-оптометрисчĕ Надежда Спиридонова. Вĕсен ĕçне, пултарулăхне, хастарлăхне те пысăк хак пачĕç.

Хĕрарăмăн ырă та пархатарлă ятне çỹлте тытма пулăшакан конкурс кăçал та иртет. Заявкăсене апрелĕн 3-мĕшĕччен йышăнаççĕ. Ĕçсене вунă номинаципе пахалĕç. Унччен вара конкурса хутшăнакансен хăйсем пирки пур енлĕн çутатакан 2 минутлăх видеоролик хатĕрлемелле. Заявкăсене Чăваш Республикинчи Хĕрарăмсен канашĕн сайчĕ çинчи конкурс баннерĕ урлă электронлă майпа çитерме май пур.

Патăрьел муниципалитет округĕнче кашни сферăрах çак конкурса хутшăнма тивĕçлĕ хĕрсемпе ача амăшĕсем сахал мар. Шанас килет, хальхинче те пирĕн чиперккесем республика шайĕнче хăйсен пултарулăхĕпе, ăсталăпе тĕлĕнтерĕç, хĕрарăм ятне тивĕçлипе хỹтĕлĕç.

Конкурсра хутшăнакансемшĕн сасăлав июнĕн 1-15-мĕшĕсенче "Чăваш Республикинчи халăх контролĕ" порталта иртмелле.

Альбина ЕГОРОВА

Хаклав

Алена ПЕТРОВА, Патăрьел муниципалитет округĕнчи халăха социаллă хỹтлĕх паракан центрти васкавлă социаллă тивĕçтерỹ пайĕн заведующийĕ, 2022 çулта "Эпĕ - хĕрарăм" конкурса хутшăннă хастар:

- Чăваш Республикин Пуçлăхĕ 2023 çула Чăваш Енри Телейлĕ ачалăх çулталăкне халалланине палăртрĕ. Çавăнпа та Чăваш Республикинчи Хĕрарăмсен канашĕ йĕркелекен конкурс кăçал тата пысăк хастарлăхпа иртессе, унта пирĕн Юхмапа Пăла тăрăхĕнчи чиперккесем тата ытларах хутшăнасса шанас килет. Эпĕ вара пĕлтĕрхи конкурса явăçса хамăн видеороликра ялти хĕрарăмăн сумне тата ытларах çĕклеме тăрăшрăм. Хамăн ĕçĕме эпĕ çав тери килĕштеретĕп, пурнăçра мана çирĕп çемье шанăç кỹрет, хавхалантарать. Çакă хĕрарăм телейĕ мар-и-ха?