Чăвашпотребсоюз кооперацине йĕркеленĕренпе кăçал 130 çул çитет. Вăл ăнăçлă аталанса пырать. Çак йышра - Патăрьелĕнчи райпо та. Кунти лавккасенче пуринче те тавара туянакансем мĕн кирлине хăйсем суйласа илме пултараççĕ. Кашнийĕнчех халăха куллен кирлĕ таварсене сутаççĕ, шăрпăкпа çăкăртан пуçласа строительство материалĕсем таранах пур. Вырăнта кăларакан продукцие мала хураççĕ.

 Патăрьелĕнчи çăкăр завочĕн ассортименчĕ те пуян. Çăкăр-булка пĕçернисĕр пуçне кунта кондитер таварĕ те сахал мар кăлараççĕ. Вĕсене куллен лавккасене леçеççĕ. Патăрьел райповĕ пĕр çакăнпа çеç ĕçлемест. Вăл халăхран сĕт, кивĕ хут пухассине те йĕркеленĕ.

Чăвашпотребсоюз системине кĕрекен ытти муниципалитет округĕсен продукцийĕсене те кăмăллаççĕ Юхма Енпе Пăлаçи тăрăхĕнче пурăнакансем. Элĕкрен тăварланă, маринадланă пахча-çимĕç, Етĕрнерен аш-какайран хатĕрленĕ апат-çимĕç, Хĕрлĕ Чутайран, Комсомольскинчен соксемпе пылак шывсем, универбазăран ыттине турттараççĕ.

Автолавкка та кирек хăш çанталăкра та çула тухать. Вăл лавкка çук ялсене эрнере икшер хут çитет. Кунта сутуçăсем ытларах апат-çимĕç продукчĕсене илсе тухма тăрăшаççĕ. Ыттисене - савăт-сапа, вырăн хатĕрĕсене, вăрлăхсене, ỹсентăрансене сап- малли наркăмăшсене, чăх-чĕп- сене...- заказпа тивĕçтереççĕ. Пĕр сăмахпа каласан райпо канашĕ халăх ыйтăвне туллин тивĕçтерсе пыма тăрăшать.

- Халăх кăмăлне туллин тивĕçтерессине мала хурса ĕçлетпĕр. Акă, Пăлапуç Нурăсĕнчи лавккана комплекслă аталану программипе килĕшỹллĕн тĕпрен юсаса кĕске хушăрах çĕнетме пултартăмăр. Çĕнĕ холодильниксемпе оборудованисем вырнаçтартăмăр. Çакă Чăвашпотребсоюз правленийĕн анлă программипе туллин усă курнипе те пулчĕ. Райпо системи тĕллевлĕ ĕçлесе пыма тăрăшать. Çакăнта Чăвашпотребсоюз правленийĕн, Патăрьел муниципалитет округĕн администрацийĕн тивĕçлĕ пулăшăвне те туятпăр. Тавар туянакансемпе те кăмăллă эпир, - терĕ райпо канашĕн председателĕ Сергей Счетчиков хăтлă услови тума пултарнине, суту-илĕве, обшествăлла апаталанăва, ытти отрасль ĕçĕ-хĕлне малалла аталантарса пынине, цифрлă технологие ĕçе кĕртнине палăртса.

Мартăн 30-мĕшĕнче Пăлапуç нурăсĕнче лавкка юсав хыççăн çĕнĕрен ĕçе пуçăнчĕ. Ял халăхне çак ятпа Ишлĕ территори пайĕн начальникĕ Марина Кабаева, Патăрьел муниципалитет округĕн ЗАГС пайĕн начальникĕ Наталья Емелина, Патăрьел райпо Канашĕн председателĕн çумĕ Людмила Хитрова саламларĕç.

2021-2025 çулсенчи комплексла аталану программине пурнăçа кĕртсе пыни Чăвашпотребсоюз предприятийĕсемпе организацийĕсене тивĕçтерỹ шайне пурнăçлама май парать. Çакă ял халăхĕн пурнăç шайне ỹстерме пулăшать.

 Хаклав

 Роза ПЛАТОНОВА, Пăлапуç Нурăс ялĕ, пенсионерка:

- Лавкка уçăлнишĕн эпир питĕ хĕпĕртетпĕр. Тивĕçлĕ канăва тухнăскерсем ытти ялсене тавар туянма çỹрейместпĕрех. Çăкăрĕ-тăварĕ куллен кирлĕ-çке. Çакăншăн Чăвашпотребсоюз правленийĕн, Патăрьел муниципалитет округĕн ертỹçисене чунтан тав тăватпăр.

Альбина АСТРАХАНЦЕВА