ЮХМАПА Пăла тăрăхĕнчи "кĕмĕл" волонтерсен хастар ушкăнĕ халăха социаллă хỹтлĕх паракан центр специалисчĕсемпе пĕрле çул çỹревре пулнă. Инçе çула выртакан экскурси маршрутне вĕсем çывхарса килекен Космонавтика кунне халалланă. Патăрьел муниципалитет округĕнчи Пенсионерсен пĕрлĕхĕн ертỹçи Полина Логунова хаçат редакцине пĕлтернĕ тăрăх вăл тухăçлă та, ăнăçлă та, асра юлмалла та иртнĕ. Чăн малтанах вĕсем Шупашкарти "СССР музейĕнче" пулса иртнĕ пурнăçа, авалхи культурăпа йăлана аса илтерекен экспонатсемпе паллашнă. Ун хыççăн Çĕнĕ Шупашкарти технологипе управлени академийĕнчи студентсен пурнăçĕпе, вĕренỹ учрежденийĕн ĕçĕ-хĕлĕпе кăсăкланнă. Академи ректорĕ Иван Селиванов профессор ентешсене хапăл туса йышăннă. Ăш пиллĕ калаçура тĕрлĕ ыйтăва хускатнă.

Пенсионер волонтерсен çул çỹревĕ Сĕнтĕрвăрри муниципалитет округĕнчи Шуршăлти Андриян Николаев летчик-космонавтăн мемориал комплексĕнче малалла тăсăлнă, вĕсем паха экспонатсемпе паллашнă. Сăмах май каласан, Туçари Валерий Салминăн çурчĕ çумĕнче йĕркеленĕ музей унăн филиалĕ шутланать