ПАТĂРЬЕЛ муниципалитет округĕнчен Украинăри ятарлă çар операцине хутшăнакан ентешĕмĕрсем патне каякан гуманитари кучченеçĕсем хушшинче кашнийĕнчех сăмсана кăтăклакан ырă шăршăллă кукăль, çĕр улми пỹремечĕ, пылак ватрушка тата ытти те пулать. Юхмапа Пăла тăрăхĕнчи пекарня коллективĕсем салтаксем патне тăтăшах хăйсен пĕçернĕ тутлă та техĕмлĕ çимĕçсене те парса яраççĕ. Кил ăшшине аса илтерекен кукăльсем те шкул ачисен ăшă салам çырăвĕсем евĕр ентешсемшĕн тем пекех паха, вăй хушма, хавхаланма, çĕнтерĕве çывхартма пулăшаççĕ.