ПАТĂРЬЕЛĔНЧЕ патшалăх çурчĕн территорийĕнче тĕрлĕрен программăпа хута янă ача-пăчана выляса савăнма, сывлăхне çирĕплетме лапамсем, спорт кĕтесĕсем, тренажер вырăнсем сахал мар. Гагарин урамĕнчи çакнашкал объект центрта малтанхисенчен пĕри темелле. Вăхăт иртнĕçемĕн вăл кивелет те, япăхать те... Тỹрех ун вырăнне çĕннине туса хума та çук. Çакна шута илсе çамрăк ашшĕ-амăшĕ - Алексей Пизенев, Сергей Белков, Аркадий Купцов ырă пуçарупа тухнă, вĕсем хăйсен вăйĕпе тата халăхран укçа пуçтарса хăйăрпа вылямалли кĕтесе çаврака ункăпа тытнă, ăна хĕрлĕ, шурă, кăвак тĕссемпе (Раççей триколорĕ) сăрласа илемлетнĕ, кунти саксене те çавăн пекех капăрлатнă. Маларах халăхсем кар тăрса çак вырăнтах тимĕр карта та тытнăччĕ.

Хальхи вăхăтра пуçарулăх, ыр кăмăллăх çав тери пысăк пĕлтерĕшлĕ. Сăваплă ĕç туни çĕре ỹкмест. Вăл пархатарлă та. Анчах пĕрлехи вăйпа тунă илеме, капăрлăха пĕрлехи вăйпах упрасси, сыхласси, лапама тирпейлесе тăрасси, ачасене телейлĕ тăвасси те тĕп тĕллевех пулмалла.