"Вĕрентỹ" наци проекчĕн "Патриотла воспитани" проекчĕпе килĕшỹллĕн Патăрьелĕнчи пĕрремĕш вăтам шкулăн 10 класĕнче пĕлỹ пухакансем порталти "вăйă 1418.рф" интеллектуаллă вăййа хутшăнчĕç. Ăна Тăван çĕршывăн 1941-1945 çулĕсенчи Аслă вăрçине (шăпах çакăн чухлĕ кун пынă хаяр çапăçу) халалланă.

Онлайн мелĕпе ирттернĕскере 14-18 çулсенчи ачасем явăçнă. Пĕтĕм Раççейри истори вăййине кăçалхипе виççĕмĕш хут йĕркеленĕ. Иртнĕ çулхине унта йышлăн хутшăннă, çавна май вăл Раççейри рекордсен кĕнекине те кĕнĕ.

Вăйă ирттерессин тĕллевĕ çитĕнекен ăрăва историе тĕплĕн пĕлме пулăшасси, ун патне интерес çуратасси, Тăван çĕршывăн Аслă вăрçин паллă пулăмĕсене аса илтересси, совет халăхĕн паттăрлăхĕпе мăнаçланасси тата ытти те пулса тăрать.

Вăйă интеллектуаллă ăмăрту шутланса тăрать. Унта хутшăнакансем ертсе пыраканăн 20 ыйтăвне хуравлаççĕ. Ленинград блокади, Сталинград çапăçăвĕ, Курск пĕкки, Кавказри тытăçу çинчен, Донбаса, Луганска, Воронежа ирĕке кăларнине... пĕлмелле. Шухăшлава аталантарни, тавçăрулăх кирлех.

Вăййа "Единая Россия" парти пулăшăвĕпе "Çĕнтерỹ волонтерĕсем" обществăлла юхăм йĕркеленĕ, унта хутшăнакансене сертификат параççĕ. Çĕнтерỹçĕ командăна дипломпа хаклă парне тивĕçет.

Альбина ИВАНОВА