"Сывлăх" наци проектĕнче ачасен сывлăхĕ пирки тăрăшасси çинчен уççăн палăртнă. Çитĕнекен ăру тĕреклĕ ỹстĕр тесен ашшĕ-амăшĕн те ку енĕпе хăйсем çине тимлĕх уйăрмаллах. Сывă пурнăç йĕркине тытса пымалла, спортпа туслашмалла, пахалăхлă апат çимелле, врач патне вăхăтран вăхăта йышăнăва каймалла. Çакна ачана та çамрăкранах хăнăхтармалла. Ун пек чухне кирек хăш чир те çулăхмасть. Иммунитет çирĕп пулать. Аслисем çумне те чĕрепе юн тымарĕсен, сывлăш сывлавĕн, усал шыçă чирĕсем, сахăр диабечĕ тата ытти чир те çыпăçмасть. Ахальтен каламаççĕ ĕнтĕ ашшĕ-амăшĕ сывă пулсан ачисем те тĕреклĕ çуралаççĕ тесе. Апла пулсан, аслисен вăй-хал тивĕçекен ĕçе çеç пуçăнмалла, çителĕклĕ таран канмалла, сиенлĕ йăласене сивлемелле, пур çукшăнах тарăхассинчен пăрăнмалла.

Инфекци чирĕсенчен ачасен те, аслисен те (хĕрлĕ шатра, шăнăр туртакан, туберкулез, полиомиелит, грипп, коронавирус тата ыттисенчен те) вакцина яртармалла.

Вăхăтран вăхăта медицина тĕрĕслевĕ витĕр тухмалла.

Ольга ЗУБОВА, Патăрьелĕнчи тĕп больница педиатрĕ