Юхмапа Пăла тăрăхĕнчи уй-хирте тусан вĕçтерсе ĕçлекен тракторсемпе агрегатсен йышĕ кунсерен хушăнса пырать. Хуçалăхсенчи каçалăксенче пĕрисем сỹрелеççĕ, теприсем çĕре апатлантараççĕ, виççĕмĕшĕсем акма çĕр хатĕрлеççĕ, акакан хуçалăхсем те пур. Уяр çанталăкра ĕç кал-кал пыни, тракторсен шавĕ пĕр тикĕс ĕçлени чуна савăнтарать!

"Куснар" хуçалăхра кăçал тĕрлĕрен культура никĕсне 1600 ытла гектарта хывса хăвармалла. Ĕçе пурнăçлама механизаторсен кăмăл-туйăмĕ пысăк. Черетлĕ çуракие Анат Чакăра пурăнакан пĕр тăван Филипповсем ытти чухнехи пекех пысăк хастарлăхпа хутшăнма шутлаççĕ. "Хурçă учĕсем" хатĕр. Çур акинчи ĕç опычĕ вара иккĕшĕн те çителĕклех. Чăваш Республикин тава тивĕçлĕ механизаторĕ Николай Михайлович кăçалхипе 45-мĕш хут тыр пул никĕсне хывма тухать! Мĕн çамрăкранах парăнтарнă вăл техникăна. Геннадий Михайлович та ку енĕпе çамрăксемшĕн ырă наставник. Уншăн кăçалхипе 35-мĕш ĕççи пуçланнă.

Альбина ЕГОРОВА