ПАТĂРЬЕЛ муниципалитет округĕн администрацийĕ çумĕнчи çул çитмен ачасен прависене хỹтĕлес тĕлĕшпе тимлекен комиссин черетлĕ ларăвĕнче тĕрлĕ ыйту пăхса тухрĕç. Вĕсенчен пĕри ашшĕ-амăшĕ хăйсен пепкине тивĕçлĕ воспитани парса, тимлĕх уйăрса çитерейменнипе çыхăннă. Çавăнпах хăш-пĕр ача шкула çỹремест, уроксене час-часах сиктерет, усал ĕç еннелле сулăнать тата ытти те. Комиссин кашни ларăвĕнче тенĕ пекех çул çитмен ачасем теветкелленсе автомашинăпа е мотоциклпа çỹренĕ тĕслĕхсем те пулаççĕ. Паллах, çуллахи вăхăтра пĕве кĕрекен каччăсен руль умне ларас килет те пулĕ. Анчах та çакă пысăк хăрушлăхпа та, тăкакпа та çыхăннă. Комиссин хальхи ларăвĕнче те икĕ ашшĕ-амăшне ачисене çак сăлтавпа пăхса çитерейменшĕн явап тыттарнă, 5-шер пин тенкĕ штраф панă.