Чăвашсен Мăнкун, тутарсен Рамазан умĕнхи уйăхсем пулчĕç. Апата пĕлсе е хăш вăхăтра çиме юраманнипе çеç çыхăнман вĕсем. Тĕн йăли-йĕркине хăнăхса пымаллине те мала хумалла. Чăтăмлăх кирлĕ, усал сăмахран, суя элекрен асăрханмалла. Ырă ĕçсем тума тăрăшмалла. Тĕслĕх илмелли сахал мар. Муниципалитет округĕнче шкулсене, клубсене, медицина пункчĕсене юсаççĕ, çĕннисем хăпартаççĕ, çулсене тикĕслеççĕ. Хăйсен тĕнне ĕненекенсем телейлĕ. Вĕсем çĕршыва, çынсене юратаççĕ. Саккунсене пăхăнса пурăнаççĕ.

Темиçе çул каялла центрти телевиденипе Хирти Пикшик ялĕн масар таврашĕ япăх пулни çинчен кăтартнăччĕ. Санитари тата экологи йĕркисене пăхăнманшăн тĕрĕслев органĕсем темиçе хутчен те асăрхаттарнăччĕ.

Масар пысăк вольтлă электролини иртекен çул çине вырнаçнă. Унтан 10 яла, сĕт заводне, фермер хуçалăхĕсене электричество пырса тăрать. Территори пайĕн пуçлăхĕ Владислав Краснов сĕнĕвĕпе пуçару ушкăнĕ йĕркелерĕç. Энергетиксене, крановщиксене, вутă касакансене... пуçтарчĕç. Нумайранпа ỹсекен 500 ытла йывăçа касма, хунавĕсене кăклама, тĕмсене тикĕслеме тиврĕ. 2500 тăваткал метр çĕре тирпейлемелле пулчĕ. Палăксене, картасене çĕмĕрмесĕр йывăçа айккине кăларасси çăмăлах мар.

Муниципалитет округĕн ертỹçисем, электросеть организацийĕн пуçлăхĕсем ирĕк памасăр, пулăшмасăр ĕçе пуçăнма май та çук. Ял халăхĕ, ентешсем, кирлĕ специалистсем хапăлах пулчĕç. Масар тирпейленчĕ. Апрелĕн 2-мĕшĕнче ĕç вĕçленчĕ. Çакна Аллах та вырăна хурĕ. Хăш-пĕр çынсем уйăхĕпе ĕçлени сая каймарĕ. Укçа-тенкĕ енчен пулăшакансем те тупăнчĕç.

Ĕçе йĕркеленĕ çĕре хутшăннă май тем пекех хĕпĕртетĕп. Ырă ĕç туни телей кỹретех. Патăрьел муниципалитет ертỹçине Рудольф Селиванова, унăн çумне Равиль Ямалетдинова, Пикшик территори пайĕн ертỹçине Владислав Краснова, ял халăхне, ентешсене, Хасиятулла, Ильгизер Махмутовсене, Иршат Чаштанов ял старостине, унăн пиччĕшне Рамиль бабая, Ильдус Кисеева, Русланпа Ринат Каштановсене, "Чăвашэнергон" Патăрьелĕнчи электросеть филиалĕн ертỹçине Александр Денисова, инженерне Рауф Даутова, Рафис Атеев тракториста, ывăлне Ильдана, Мансур Хасянова, Радик Фазуллина, Нияз Кепечева, Асхать Валиуллова тата ыттисене тав тумалăх пур.

Альфир ВАЛИТОВ, имам-хатыб