Патăрьелĕнчи ачасен ăсталăх шкулĕнче Анатолий Кокель художник ĕçĕсен "Пурнăç урапи" куравĕ уçăлчĕ. Анатолий Васильевич кỹршĕллĕ Комсомольски районĕнчи Шурут ялĕнчен. Çураласса вара 1959 çулта Турханта çуралнă. Вăтам шкул хыççăн И.Я.Яковлев ячĕллĕ Чăваш патшалăх педагогика институчĕн художествăпа графика факультетĕнче пĕлỹ пухнă. Вăл Алексей Кокелĕн тăванĕ. Алексей Афанасьевич профессор ĕçне малалла тăсаканĕ.

Выставка маларах тĕп хулари Чăваш Енри Халăхсен туслăхĕн çуртĕнче ĕçленĕччĕ. Ăна Раççейри культура эткерлĕхĕн тата Чăваш Енри Мухтавлă ентешсен çулталăкне халалланă. Алексей Васильевич тĕрлĕ сферăри сăрă ăсти, тĕрлĕ енлĕ ĕçлет. Çакă ĕçĕсенче те палăрать. Кашни ỹкерчĕкĕ хăйне майлă, уççăн курăнать. Сăнарсен йышĕнче ученăйсем, искусство, наука çыннисем, пачăшкасем, поэтсем, преподавательсем... пур. Тăван енте çуралнă пултаруллă çынсен сăнарĕсене республика историне кĕртме пултарчĕ. 100 ытла ĕçре çут çанталăк илемĕ, натюрморт, сăнарсем...

Студент чухнех вăл малтанхи хăнăхусене Николай Овчинников профессортан нумай илнĕ. Алексей Григорьев профессиллĕ искусствовед ỹкерес ăсталăха сахал мар вĕрентнĕ ăна.

"Малтанласа эпĕ ача сăнарĕсене ỹкерме пуçăннăччĕ. Кайран çут çанталăк илемĕ çине куçрăм. Ĕçсенчен ытларахăшĕ - çынсен сăнарĕсем. Вĕсене ỹкерме çăмăлах мар, çавах килĕшет. Вăй-халăм пур чухне тата та ĕçлесшĕн-ха. Пурнăçра çак çула суйласа илме пулăшакансене тавах",- тет Анатолий Васильевич.

Анатолий Кокель ăста ỹнерçĕ пирки унăн юлташĕсем сахал мар ырă сăмах каларĕç. Чăваш халăх поэчĕ, Чăваш Республикин искусствăн тава тивĕçлĕ ĕçченĕ, философи наукисен докторĕ Николай Исмуков, Чăваш Республикин культурăн тава тивĕçлĕ ĕçченĕсем Николай Кушмановпа Василий Кервен, Михаил Краснов писатель, Патăрьелĕнчи ачасен ăсталăх шкулĕн преподавателĕ Валентин Сергеев тата ыттисем те.

Курава Патăрьелĕнчи ачасен ăсталăх шкулĕн ертỹçи Алина Антонова уçрĕ. Çакнашкал çынсем пирĕн хушăмăрта пулнине ырларĕ. Килнĕ хăнасемпе ачасен ăсталăх шкулĕн вĕренекенĕсем курава тăратнă ĕçсемпе паллашрĕç.

Альбина АСТРАХАНЦЕВА