2023 çулхи апрелĕн 10-20-мĕшĕсенче çырăнтару вунăкунлăхĕ акци иртет. Çак тапхăрта почта çыхăнăвĕн уйрăмĕсенче иккĕмĕш çур çул валли "Авангард" хаçата 542 тенкĕ те 46 пуспа çырăнтараççĕ. Çак ĕç мĕнле пынипе кăсăкланса Патăрьел почта çыхăну уйрăмĕнче пултăмăр.

 - Пирĕн уйрăмра 6 почтальонка. Вунăкунлăх çырăнтару акцийĕсене вĕсем кĕтсех тăраççĕ. Кашнийĕ хаçат вулаканĕсемпе çывăх. Умма çур çула валли лартнă тĕллевсене пурнăçлатпăрах. Чи харсăрри - Оля Иванова. "Авангарда" 142 киле çитерет. Советская урамне, "Корма" çĕр ĕç фирми çывăхĕнчи çуртсене, тăкăрлăксене валеçет. Тăрăн ялне Ирина Михеева çỹрет. Унăн 84 çемье район хаçачĕпе туслă,- тет уйрăм начальникĕ Антонина Смирнова.

Почтальонсем хăйсен хушшинче тĕслĕхли Елена Сорокина пулнине палăртрĕç. Тивĕçлĕ канура пулин те Елена Николаевна юратнă ĕçрен уйрăлмасть. Унăн участокĕнче предприятисемпе организаци сахал мар. Вĕсене заказлă çырусем вăхăтра çитерет. Яваплăха туйса ĕçлени куç кĕретех. "Авангарда" çырăнтарнисĕр пуçне почта таварĕсемпе те тивĕçтерет.

Кирек ăçта та йывăрлăхсăр пулмастех. Пĕр вăхăт Кĕçĕн Патăрьелĕнче почтальонка пулмарĕ. Халĕ унта Гузель Аитова çỹрет. Çывăх вăхăтрах вăл ял халăхĕпе пĕр чĕлхе тупма пултарчĕ.

Наталия Быкова - Красномайски кинĕ. Вăл ĕçе пуçăнни те çулталăк çеç. Çавах ĕçĕ килĕшнине çирĕплетет. Куллен халăх хушшинче пулса мĕн чухлĕ çĕннине пĕлетĕн. Унăн участокĕнче те "Авангарда" 68 çемье çырăнать.

 Ирина Карягинан Патăрьелĕнче палламан çынни çук. Çырăнтару ĕçĕнче çакă та пĕлтерĕшлĕ. - Ака ĕçĕсем вăй иличчен акци ирттерни вырăнлă та. Тепĕр чухне ĕçлĕ халăха килте тĕл пулма çукрах. Вăрлăхсем туяннă, акнă-лартнă чухне укçи-тенки ытларах та кирлĕ.

"Авангарда" çырăнакансем йышлă. Ăна кăмăлласа вулаççĕ. Салам, пĕлтерỹ страницисем те кирлех. Кашни ялта кам çуралнине, пурнăçран уйрăлнине пĕлетĕн. Муниципалитет пурнăçĕ те яр-уççăн çуталать. Тата мĕн кирлĕ,- терĕç почтальонкăсем хул урлă сумккисене çакнă май.

 "Авангарда" почта çыхăну уйрăмĕн операторĕсем те çырăнтараççĕ.

 Альбина АСТРАХАНЦЕВА