УСАЛ тени яланах çуран мар, утпа çỹрет. Юлашки вăхăтра электронлă сигарет, спайс, наркотик сăмахсемпе час-часах усă курма пикенни те ахальтен мар. Çамрăксем усал еннелле туртăнни, сывлăхне сиенлени пурне те пăшăрхантарать. Çавăнпа та профилактика субъекчĕсен çак ыйтăва тимлĕхрен кăлармалла мар, çамрăксемпе тăтăшах куçа-куçăн тĕл пулмалла, наркотик серепине çакланасран асăрханмалла. Муниципалитет округĕн администрацийĕ çумĕнчи наркотике хирĕç кĕрешес енĕпе ĕçлекен комиссин черетлĕ ларăвĕнче Патăрьелĕнчи тĕп больницăри Надежда Надина врач-психиатр-нарколог тата РФ ШĔМĕн муниципалитетсем хушшинчи "Батыревский" уйрăмĕн полици начальникĕн çумĕ Алексей Быков ку тĕлĕшпе Юхмапа Пăла тăрăхĕнчи лару-тăрупа паллаштарнă май шăпах çак ыйтусене çивĕчлетнĕ.