Апрелĕн 13-мĕшĕнче округ администрацийĕн ларусем ирттермелли Пысăк залĕнче Патăрьел муниципалитет округĕн депутатсен Пухăвĕн черетлĕ ларăвĕ иртнĕ. Унăн ĕçне Патăрьел муниципалитет округĕн пуçлăхĕ Рудольф Селиванов, район прокурорĕ Андрей Афанасьев, муниципалитет депутачĕсем, округ администрацийĕн структура подразделенийĕсен ертỹçисем хутшăннă. Ларăва депутатсен Пухăвĕн председателĕ Николай Тинюков ертсе пынă.

Тĕп ыйту Патăрьел муниципалитет округĕн депутатсен Пухăвĕн "Патăрьел муниципалитет округĕн 2023 çул тата планпа пăхнă 2024, 2025 çулĕсенчи бюджечĕ çинчен" калакан йышăнăвне тỹрлетỹсем кĕртесси пулнă. Çапла вара округăн кăçалхи бюджечĕ тупăшсем енĕпе унччен çирĕплетнинчен 82 млн тенкĕ, расхутсен пайĕ 125,4 млн тенкĕ ỹснĕ.

Депутатсем кун йĕркине кĕртнĕ 15 ыйтăва та пăхса тухнă, кашнийĕнпех тивĕçлĕ йышăнусем тунă.

Александр ИВАНОВ