Патăрьел муниципалитет округĕн территорийĕнче апрелĕн 15-мĕшĕнчен пуçласа майăн 31-мĕшĕччен "Хăтлă хула хутлăхне йĕркелесси" федераци проекчĕн "Çурт-йĕр тата хула хутлăхĕ" наци проекчĕпе килĕшỹллĕн 2024 çулта тирпей-илем кĕртмелли объектсене суйласа илессипе онлайн-сасăлав иртет. Сăмах май, программа 2017 çултанпа ĕçлет.

Проекта 1000 ытла çын пурăнакан ялсем хутшăнаяççĕ. Пирĕн муниципалитетра ун пеккисем пиллĕк: Патăрьел, Хирти Пикшик, Сăкăт, Тутар Сăкăт, Шăнкăртам.

 2017 çултан пуçласа 2022 çулччен программăпа усă курса 14 проекта пурнăçа кĕртнĕ, вĕсене пурнăçлама 43 млн тенкĕ уйăрнă. Патăрьелĕнчи культурăпа кану центрĕнчи "Юбилейлă" парка автомашина лартмалли лаптăкпа, Кепе юханшыв территорине (пĕрремĕш тапхăрне пурнăçлама), "Арбат" сквера хăтлăлатнă. Çавăн пекех Шăнкăртамри "Халăхсен туслăхĕ" çамрăксен паркне, Хирти Пикшикри Фирдус Камалетдинов урамĕнчи "Хальхи", Сăкăтри Советски урамĕнчи "Туслăх" скверсене тирпейленĕ, çĕнĕ сăн кĕртнĕ.

2020 çултанпа хăтлăх кĕртмелли объекта Раççей Строительство министерстви йĕркеленĕ za.gorodsreda.ru онлайн-платформа урлă палăртма май пур. Сасăлава 14 çул тултарнисем тата унран аслăраххисем хутшăнма пултараççĕ.

Кăçал Тутар Сăкăтĕнчи икĕ объектăн шăпине татса пама тивет: Тĕп урамри Çĕнтерỹ скверĕ тата Шкул урамĕ. Хăшĕ ытларах сасă пухать, çавна çитес çул хăтлăх кĕртме укçа уйăраççĕ.

Çынсем патшалăх тивĕçтерĕвĕсен (Госуслуги) порталĕнче za.gorodsreda.ru онлайн-платформа урлă тата нумай функциллĕ центра (МФЦ) кайса хăйсен шухăшĕсене пĕлтерееççĕ. Аслă çулхисен пурин те компьютер, смартфон çуккине шута илсе 25 волонтера явăçтарнă. Пурте Добро.ру сайтра регистрациленнĕ. Вĕсене нумай функциллĕ центрта, "Юхма" пасарта, Тутар Сăкăтĕнчи культура центрĕнче, суту-илỹ çурчĕсенче, халăх йышлă пухăнакан вырăнта курма пулать.

Хамăр пурăнакан вырăн хăтлăрах та илемлĕрех пулассине кашнийĕн аллинче, çавна май сасăлава хастар хутшăнасса шанса тăртапăр.

 Ольга ПАВЛОВА