Тăван çĕршывăн Аслă вăрçин ахрăмĕ кунран-кун хыçала юлса пырать. Çавах вилĕме куçа-куçăн тăрса тунă Çĕнтерỹ манăçа тухмастех. Салтаксен паттăрлăхĕ, тылри хастарлăх мухтавлă.

 Тăван çĕршывăн Аслă вăрçинче Çĕнтерỹ тунăранпа 78 çул тултарас умĕн Патăрьел муниципалитет округĕнче "Çĕнтерỹ ялавĕ умĕнчи часовой" акци старт илчĕ. Унта кашни вăтам шкулах хутшăнать. Сăваплă ĕç Çĕнтерỹ кунĕнче - майăн 9-мĕшĕнче вĕçленет.

Апрелĕн 12-мĕшĕнче Çĕнтерỹ Ялавĕн копине Патăрьелĕнчи пĕрремĕш вăтам шкула илсе килчĕç. Сумлă мероприятие Патăрьел муниципалитет округĕн администрацин вĕрентỹ, çамрăксен политики, физкультура тата спорт управленийĕн начальникĕн çумĕ Николай Анисимов, муниципалитет округĕн пуçлăхĕн çамрăксемпе ĕçлекен канашçи Юлия Селиванова, вăтам шкул директорĕ Наталия Андреева хутшăнчĕç.

 "Çĕнтерỹ ялавĕ умĕнчи часовой" акци çитĕнекен ăрăва çарпа патриотла воспитани парас, ирĕклĕхшĕн тата Тăван çĕршывăн никама пăхăнманлăхĕшĕн тăнă çынсен паттăрлăхне хисепе хурас тĕллевпе иртет. Ертсе пыракансем Çĕнтерỹ Ялавĕн историйĕпе паллаштарчĕç. Ялава йышăннă май вĕренекенсем шанăçа тỹрре кăларма пулчĕç. Шкулта паттăрлăх урокĕсем пулаççĕ. Хисеплĕ караулта чи тивĕçлисем тăраççĕ.

 Çĕнтерỹ мĕнле йывăрлăхпа килнине манмалла марах пирĕн. Вăрçă паттăрĕсене асра тытмаллах.

Альбина ИВАНОВА