Анастасия Юманова Патăрьелĕнчи 1-мĕш вăтам шкулта вĕренет. Вăл кашни предметах килĕштерет. Çавна пулах пур предметпа та "5" паллăпа çеç вĕренет. Хăй тĕллĕн сахал мар тата тĕллевлĕ ĕçлет. Информацие хăвăрт алла илет. Уроксемсĕр пуçнă кружок тата факультатив занятийĕсене çỹрет. Проектсем хатĕрлет, муниципалитет, регион шайĕнчи олимпиадăсемпе конкурссене хутшăнса малти вырăнсене çĕнсе илет. 2021-2022 вĕренỹ çулĕнче Настя историпе, географипе, физкультурăпа призер, ОБЖпа çĕнтерỹçĕ пулнă.

Ăсталăх конкурсĕсене хастар хутшăнать хĕр. Пĕтĕм Раççейри студентсемпе çамрăксен фестивалĕнчен II степеньлĕ дипломпа таврăнчĕ. Шкул ачисем валли "Центавр" йĕркеленĕ интеллектуаллă вăйăсенче те çĕнтерỹçĕ пулчĕ.

Спортпа та туслă Настя. Волейбол секцине çỹрет. 2021 тата 2022 çулсенче Чăваш Республикин "Шкул волейбол лиги" суперфиналĕнче çĕнтерсе командăпа чемпион пулчĕç. Районти волейбол тупăшăвĕнче вăл "Чи лайăх вылякан" ята тивĕçрĕ.

"Юнармия" членĕ Настя. Шкулти çарпа патриот клубĕн пурнăçне хастар хутшăнать. "Зарница" вăйăра вĕсен команди районта пĕрремĕш вырăн йышăннăччĕ. Республикăра вара призера кĕнĕчччĕ. Ĕçчен, тирпейлĕ, уçă кăмăллă хĕр. Кирек кама та пулăшма хатĕр. Унăн портфолиовĕнче республикăри вĕрентỹ, çамрăксен политики министерствин Тав çырăвĕ те пур. Пĕрлех сывă пурнăç йĕркине сарас ĕçе тивĕçлĕ тỹпе хывнăшăн район администрацийĕн Тавне те тивĕçнĕ.

Тăрăшулăхĕ, çирĕп те ырă кăмăлĕ, çутă ĕмĕчĕ савăнăç кỹрет ăна. Пăтăрмахсене çĕнтерме, лайăххисене кăна асăрхама пĕлекен хĕр ача мĕн пĕчĕкрен яваплăха хăнăхса пырать.

Альбина АСТРАХАНЦЕВА