ХАЛЬХИ вăхăтра республикăра та, пирĕн Юхмапа Пăла тăрăхĕнчи ял хуçалăх предприятийĕсемпе фермер хуçалăхĕсенче те хĕрсех ака-суха ĕçĕсем пыраççĕ. Хăшĕ-пĕри çунтармалли-сĕрмелли материала, удобрение çителĕклĕ туянса хуман пирки çак ĕçе çур аки вăхăтĕнчех пурнăçлать. Мĕн чухлĕ кирлĕ, çавăн чухлĕ туянать. Анчах та васканă вăхăтра йăнăшасран та асăрханмалла. Вĕсене Интернет тетелĕ урлă туянас тесен пушшех те тимлĕ пулмалла.

Нумай пулмасть республикăри пĕр муниципалитет округĕнчи фермер тĕнче тетелĕнчи пĕлтерỹпе удобрени туянма пикеннĕ, сутуçăна 440 пин тенкĕ куçарса панă. Лешне çакă çеç кирлĕ пулнă, укçи счечĕ çине куçсанах вăл тỹрех фермерпа çыхăнăва татнă. Çапла вара çĕр хуçи удобренисĕр те, укçасăр та тăрса юлнă. Çур аки никама та хушма тăкак ан кỹтĕр, вăл пăтăрмахсăр вĕçлентĕр, ултав валли те сăлтав ан пултăр!