ПАТĂРЬЕЛĔНЧИ тĕп библиотекăри информаци центрĕн заведующийĕ Ольга Моисеева хастар волонтер ĕçре çеç мар, обществăра ырă пуçарусене пурнăçа кĕртес ĕçре те кăтартуллă. Нумай пулмасть вăл Юхмапа Пăла тăрăхĕнчи вĕренỹ учрежденийĕсемпе пĕр чĕлхе тупса Раççейри "Ырă хупă" ("Добрые крышки") акцие йĕркелесе янă.

 Хальхи вăхăтра тавралăха таса тытассипе, экологипе çыхăннă ыр кăмăллăх проектне ача садне çỹрекенсем те, шкул ачисем те хастар хутшăнаççĕ, вĕсем пурте пластик (сок, сĕт тата ытти) савăтсен хупписене Патăрьелĕнчи тĕп библиотекăна илсе килсе параççĕ.

Çак кунсенче Ольга Вячеславовна пуçтарнă хупăсен пĕрремĕш ушкăнне ЧР Патшалăх Канашĕн депутачĕ Валерий Антонов урлă пластиксене çĕнĕрен тирпейлесе кăларакан завода ăсатма хатĕрленет. Енчен те сирĕн килте çакнашкал хупăсем пулсан Патăрьелĕнчи тĕп вулавăша çитерме пултаратăр. Акцие кĕçĕннисемпе пĕрлех аслисем те кар тăни вара хамăр пурăнакан тавралăха тасарах тума, йывăр шăпаллă ачасен пурнăçне çăмăллатма та пулăшĕ. Унăн тĕп тĕллевĕ шăпах çавăн пек.