Еншикре çăмăл атлетикăпа тĕнче класлă спорт мастерĕн Фаина Краснован парнисене çĕнсе илессишĕн йăлана кĕнĕ республика ăмăртăвĕ иртнĕ.

Спортсменсене муниципалитет округĕн пуçлăхĕн пĕрремĕш çумĕ, хăтлăх кĕртессипе территори аталанăвĕн управленийĕн начальникĕ Николай Раськин, Патăрьелĕнчи ачасемпе çамрăксен спорт шкулĕпе "Паттăр" ФСК директорĕн тивĕçĕсене пурнăçлакан Анатолий Афанасьев саламланă.

Ăмăртăва 15 командăра 180 спортсмен хутшăннă.

 4-5 классене çỹрекен хĕрачасемпе арçын ачасем 300 метра, 6-7 классенчи хĕрачасем, 35-44 çулсенчи хĕрарăмсем тата вĕсенчен аслăраххисем 500 метра, 6-7 классенчи арçын ачасем, 8-9 классенчи арçын ачасемпе хĕрачасем, 40-50 çулсенчи арçынсем тата вĕсенчен аслăраххисем, 18-34 çулсенчи хĕрарăмсем 1000 метра, 10-11 классенче вĕренекенсем 2000 метра, 2002 çулта çуралнă арçынсем тата 2003-2004 çулсенче çуралнă çамрăксем 3000 метра чупнă.

Çĕнтерỹçĕсене уйрăмшарăн та, командăпа та палăртнă. Мала тухнисене дипломсемпе наградăланă.

Альбина ИВАНОВА