Аслă Вĕрентекенĕмĕр Иван Яковлев çуралнăранпа 175 çул çитнине халалласа апрелĕн 22-мĕшĕнче Патăрьелĕнчи ача-пăча искусство шкулĕнче виçĕ лапамра мероприяти иртрĕ.

Регионсем хушшинчи "Чăваш Ен" конкурса Чăваш, Тутар республикисенчи тата Ульяновск облаçĕнчи музыкантсемпе художниксем те хутшăнчĕç.

Пĕрремĕш лапамра çамрăк ỹнерçĕсем Чăваш Республикинчи илемлĕ вырăнсене, йăла-йĕркене хут çине сăнларĕç. Юнашарах "Иван Яковлевăн калавĕсемпе юмахĕсем - ача-пăчана ăса вĕрентекен историсен çăлкуçĕ" куçăмсăр конкурс пычĕ.

Чăваш юрри-ташшипе иккĕмĕш лапамра паллашма май пулчĕ. Шăпах кунта гала-концерт иртрĕ.

"Чăваш патриархĕн Иван Яковлевăн ăс-хакăл эткерлĕхне тĕпе хурса чăваш наци культурине упрасси тата аталантарасси" темăпа регионсен хушшинчи çавра сĕтеле Тутар Республикинчи Çĕпрел, Пăва, Ульяновск облаçĕн Чăнлă районĕсенчен сумлă хăнасем килсе çитрĕç. Çавăн пекех кỹршĕ Комсомольски, Елчĕк тăрăхĕсенчи библиотекарьсем, вĕрентекенсем, культура ĕçченĕсем, краеведсем хутшăнчĕç.

Мероприяти Патăрьелĕнчи культурăпа кану центрĕнче тăрăшакансем Иван Яковлевăн халалне вуланинчен пуçланчĕ. Ĕçлĕ калаçăва Патăрьел муниципалитет округĕн пуçлăхĕн çумĕ - финанс пайĕн начальникĕ Светлана Чернова, культурăпа туризм, информаци пайĕн пуçлăхĕ Наталия Никитина хутшăнчĕç.

Çавра сĕтелте тĕрлĕ темăпа тухса калаçрĕç, паянхи пурнăç ыйтăвĕсене, тăван чĕлхене упраса хăварассине хускатрĕç. Аслă Вĕрентекенĕмĕр халалне асра тытса ăса хывмаллине палăртрĕç, усăллă сĕнỹсем пачĕç.

Регионсем хушшинчи конкурса пĕтĕмлетнĕ май мероприятире палăрнисем лауреатсем пулчĕç, дипломсене тивĕçрĕç, чи маттурисене конкурсăн медалĕсемпе тата кубокĕсемпе чысларĕç.

 Светлана КУЛАКОВА, Чăваш наци конгресĕн вырăнти уйрăмĕн председателĕ