Апрелĕн 25-мĕшĕнче Патăрьел муниципалитет округĕнче Пĕтĕм Раççей шайĕнчи "Георгий хăйăвĕ" акци старт илчĕ. Ăна Тăван çĕршывăн Аслă вăрçинче Çĕнтеру тунăранпа 78 çул çитнипе çыхăнтарса, унта пуç хунă салтаксене асра тытас тĕллевпе йĕркелеççĕ. "Георгий хăйăвĕ" акци - иртнĕ ăрурисемпе çамрăксен эстафети, халăх астăвăмĕ, аттесен, асаттесен,мăн асаттесен паттăрлăхне, хамăр халăха, хамăр чĕлхене, хамăр ята хисепе хуни. Юнпа, тарпа çĕнсе илнĕ Çĕнтерĕве манмалла мар пирĕн.

 Тăван çĕршывăн Аслă вăрçи вăхăтĕнче виçĕ степеньлĕ Мухтав орденне çирĕплетнĕ. Вăл шăпах Георгий хăйăвĕ тĕслĕ пулнă. Патăрьелĕнчи пĕрремĕш вăтам шкулти иккĕмĕш класс волонтерĕсем ăна пĕр хĕвеллĕ кун сехет хушшинчех муниципалитет округĕнче пурăнакансене тата унта килнĕ хăнасене - 450 çынна - пама ĕлкĕрнĕ.

 Альбина ИВАНОВА