Ирпе ĕçе килнĕ чухнех халăха социаллă пулăшу паракан центрти тĕп специалист-эксперт Раиса Киргизова пĕр ватă çынна тĕл пулчĕ. Патăрьелĕнчен аякра пурăнаканскер округ центрне пит килсех те кайман-мĕн вăл. Ветерана тивĕçекен çăмăллăхсем çинчен тĕплĕн пĕлесшĕн. Вĕсемпе усă курма май пуррипе е çуккипе интересленет. Раиса Сергеевна ăна ĕç пỹлĕмне илсе кĕчĕ. "Ветерансем çинчен" калакан саккунпа паллаштарчĕ. Ватă çын ыйтакан тивĕçтерĕве илес тесен кирлĕ документсене хатĕрлеме сĕнчĕ. Ун хыççăн йышăнăва ыттисем кĕчĕç.

Куллен ĕç вăхăчĕ çапларах иртет тĕп специалист-экспертăн. Ветерансене, сусăрсене, радиацие пула шар курнисене пурăнмалли çурт-йĕрпе коммуналлă тивĕçтерỹсемшĕн уйăхсерен татăлассине йĕркелесе пырать. Çар инваличĕсене хушма тỹлев куçарассине йĕрлет. Чăваш Республикинчи сывлăх сыхлав организацийĕсене пỹре тивĕçлипе ĕçлемен инвалидсене юн улăштарма кайнă чухне кирлĕ пулакан çул расхучĕсене хуплакан тăкаксене саплаштаракан хутсене хатĕрлет.

 "Ветерансем çинчен" тата "Раççей Федерацийĕнчи инвалидсен социаллă хỹтĕлевĕ çинчен" калакан саккунсемпе килĕшỹллĕн граждансен пурăнмалли çурт-йĕр условийĕсене лайăхлатмалли прависене кирлĕ çынсем патне çитерет тата ытти те.

Специалист хăйĕн ĕçне тивĕçлипе туса пынине çирĕплетет социаллă хỹтлĕх пайĕн начальникĕ Наталия Никитина. Яваплăха туять вăл. Çынсемпе сăпайлă. Ун патне пыракан тивĕçлĕ консультаци илме пултарать.

Тăрăшулăхне кура - чысĕ. Раиса Киргизован Патăрьел район администрацийĕн, Чăваш Республикин сывлăх сыхлавĕпе социаллă аталану министерствин, социаллă хỹтлĕхпе ĕç министерствин Хисеп хучĕсем пур. Иртнĕ çулхи кăтартупа тата тепĕр чыса тивĕçрĕ. Ăна Патăрьел муниципалитет округĕнче "Професси тĕлĕшпе чи лайăххи" ята пачĕç.

 Раиса Сергеевнан ĕç стажĕ те сахал мар. Вăл çак сферăра 2001 çултанпа ĕçлет. Маларах Чăваш патшалăх ял хуçалăх академийĕнче аслă пĕлỹ илнĕ.

Хĕрарăм тăрăшулăхĕ килте те палăрать. Тĕп килтен уйрăлса тухса вĕсем Сергей мăшăрĕпе Анат Туçара çурт лартнă. Икĕ ывăлĕ те вĕренеççĕ. Асли аслă пĕлỹ илесшĕн. Кĕçĕнни Туçари вăтам шкула çỹрет.

 Альбина КАПИТОНОВА