Патăрьелĕнчи ачасемпе çамрăксен спорт шкулĕпе "Паттăр" ФСКра пĕр тăван Цветковсен парнисене çĕнсе илессишĕн ирĕклĕ майпа кĕрешсе мала тухассишĕн республика турнирĕ иртнĕ.

Ăмăртăва хутшăнакансене тата хăнасене Патăрьел муниципалитет округĕн пуçлăхĕ Рудольф Селиванов саламланă.

 Сумлă хăнасен йышĕнче ирĕклĕ майпа кĕрешес енĕпе СССР спорт мастерĕ, Европа чемпионачĕн кĕмĕл призерĕ Иван Григорьев, Патăрьел ентешлĕхĕн председателĕ Александр Миронов, Чăваш Республикинчи кĕрешỹ спорчĕн федерацийĕн вице президенчĕ, ирĕклĕ майпа кĕрешекенсен Чăваш Енри пĕрлештернĕ командин тĕп тренерĕ Арсен Келехсаев, ирĕклĕ майпа кĕрешес енĕпе тава тивĕçлĕ СССР спорт мастерĕ, 4 хутчен тĕнче тата Европа чемпионĕ Сергей Корнилаев, спорт министерствин олимп резервĕсен пиллĕкмĕш спорт шкулĕн директорĕ Илья Фомин тата ыттисем те пулнă.

Турнира Чăваш Енри муниципалитет округĕсенчи тата хуласенчи, кỹршĕллĕ Ульяновск облаçĕнчи 100 ытла спортсмен явăçнă. 11 виçе категорийĕпе 15-17 çулсенчи ачасем кĕрешĕве тухнă.

 Çĕнтерỹçĕсене медальсемпе, грамотăсемпе, хаклă парнесемпе чысланă.

 Пĕлме

 Александр Николаевич Цветков - ирĕклĕ майпа кĕрешес енĕпе Раççей спорт мастерĕ. Чăваш Ен чемпионачĕсенче (1997, 1999, 2000, 2003, 2004, 2008) çĕнтернĕ. Чăвашсен спорт олимпиадин пăхăр призерĕ (1998, 2000), Василий Чапаев ячĕллĕ Пĕтĕм Раççейри турнирта (1994, 2003, 2004) икĕ хутчен çĕнтерỹçĕ тата пăхăр призерĕ, Атăлçи тата Урал тăрăхĕн ăмăртăвĕнче кĕмĕл призер, Атăлçи округĕн чемпионатĕнче çĕнтерỹçĕ пулнă,

Сергей Петрович Цветков - ирĕклĕ майпа кĕрешес енĕпе Раççей спорт мастерĕ (1998). Чăваш Енри "Юность России" спорт обществин ăмăртăвĕнче (1995) мала тухнă. Республикăн 1994, 1996, 1997, 1999, 2000 чемпионачĕсенче пăхăр тата кĕмĕл медальсене тивĕçнĕ, Василий Чапаев ячĕллĕ Пĕтĕм Раççейри турнирта (1997) кĕмĕл призер, Чăвашсен спорт олимпиадин (1994, 1996, 1998, 2000) çĕнтерỹçи, кĕмĕл тата пăхăр призерĕ, тĕрĕк халăхĕсен тĕнчери пĕрремĕш спорт вăййисен пăхăр призерĕ (1996) пулнă.