2022 çултан республикăри ял хуçалăх министерстви хушма хуçалăхран продукци туса илекен хăй тĕллĕн ĕçлекенсене (самозанятый) субсиди пама пуçларĕ. Патшалăх пулăшăвне Патăрьел тăрăхĕнче пурăнакансем те туйрĕç. Вĕсенчен пĕрисем - Кзыл Чишмари Замалетдиновсем.

Ял çынни выльăх-чĕрлĕх яланах усранă. Замалетдиновсен те вити пушă тăрса курман. Кил-хуçалăха тĕреклетме сĕт, аш-какай сутса укçа тунă. Паян та вĕсен картиш тулли выльăх: сăвăнакан ĕне 9 пуç, çавăн пекех пăрусем, сурăхсем пур.

- Эпĕ ялти лавккара ĕçлетĕп, мăшăр сĕт турттарать. Шалупа кăна алă-ура çавăрса пыма çăмăлах мар, выльăх кирлех. Юлашки вăхăтра ĕне шутне ỹстерес шухăш пурччĕ. Кзыл Чишма территори пайĕн пуçлăхĕ Раил Камалов пĕр пухура хăй тĕллĕн ĕçлекенсене патшалăх паракан пулăшу пирки тĕплĕн ăнлантарса панă хыççăн программăна хутшăнас кăмăл çуралчĕ. Раил Харисович тата специалистсем тивĕçлĕ документсене пухма пулăшрĕç. Çапла майпа ĕнесен шутне ỹстертĕмĕр. Ĕмĕтленни пурнăçланчĕ, - тесе пĕлтерчĕ калаçу сыпăннă май Разина Фаритовна.

Хушма хуçалăхра выльăх усрама условисем те аван. Ĕнесене пĕр витере, пăрусене тепринче тытаççĕ. Ĕçе çăмăллатма тăрăшни те курăнать - сĕте аппаратпа сăваççĕ.

Апат тĕлĕшĕнчен те йывăрлăхсем çук. Замалетдиновсен пурĕ 15 гектар çĕр, унта курăк, тырă çитĕнтереççĕ. Выльăхсен рационне пуянлатма жом, силос туянаççĕ, пĕрлех витаминсем те хушса параççĕ. Техникăна та çынран ыйтмалла мар, хăйсен трактор тата кăкарса çỹремелли хатĕрсем пур.

- Выльăха пĕччен пăхаймастăн. Витери ĕçсене мăшăрпа пурнăçлатпăр. Кăнтăрла пăянам нумай пулăшать. Эпĕ лавккаран çитнĕ тĕле ĕнесене сума пуçлать, апатне те парать. Пĕр сăмахра пурăннăран ку санăн ĕç, ку манăн темен нихăçан та. Хусанта вĕренекен ывăл та яла килсен пушă тăмасть. Пĕчĕкренех пирĕнпе юнашар вăл. Çулла кĕтĕве те тухать, - терĕ Разина Замалетдинова.

Чăннипех те Замалетдиновсем ĕçлĕхлĕ, хăйсен тăрăшулăхĕпе ыттисемшĕн те тĕслĕхлĕ.

Ольга БЕЛЬДЕКОВА