Унчченрех Туçа территори пайĕнчи Байбарус çырминче 4 пĕвеччĕ. Вăхăт иртнĕçем вĕсене пурне те çурхи шыв çурса юхтарнă. Çут çанталăк илемĕпе киленсе лармалли, пулă тытмалли вырăн юлман тесен те юрать. Пухăнса тăракан шыв ытти чухне те кирлех. Тепĕр чухне вут-кăвар тухсассăн та çак ыйту канăçсăрлантарма пăхать. Çакна шута илчĕç те ĕнтĕ Патăрьел муниципалитет округĕн депутатсен Пухăвĕн депутачĕ Анатолий Каргин тата Кивĕ Ахпỹртри Петр Кошкин фермер. Ĕçе пурнăçлама шалти ĕçсен органĕнче вăй хурса тивĕçлĕ канăва тухнă Андрей Кошкин та пулăшрĕ. Шупашкарти "ИНЖКОМ" пĕрлешỹ директорĕ Николай Пыркин (çак ялта çуралса ỹснĕскер) экскаваторпа тивĕçтерчĕ.

Çыран хĕррине хумалли плитасемпе шыв юхмалли кăшăлсене туяннă хыççăн ĕç пуçланчĕ. Александр Кошкинпа Александр Каргин механизаторсем хавхаланса вăй хучĕç.

Паян пĕвеленĕ çĕртен каçса çỹреме пулать. Шыв пуçтарăнса тăма пуçлани тата хавхалантарать.

- Хăвăр ятран çĕр çине хăвармалли ырă ĕç турăр,- тет ял хуçалăх предприятийĕн ветеранĕ, нумай çул "Гвардеец" колхозра комплексла бригада бригадирĕ, колхоз председателĕ пулса ĕçленĕ Николай Петрович Кошкин.

Альбина ИВАНОВА