Хусан хулинчи олимп резервĕсене хатĕрлекен "Ак Барс" шкулăн "Ракета" структура подразделенийĕнче кĕрешекенсен уçă турнирĕ иртнĕ. Унта 2007-2010 çулсенче çуралнă ачасем явăçнă. Тупăшусене Патăрьелĕнчи ачасемпе çамрăксен спорт шкулĕпе ФСК "Паттăр" спортсменĕсем те хутшăннă. Ильшат Купкенов 50 килограмлă виçерисемпе кĕрешсе пĕрремĕш, Фаяз Абитов 30 килограмлисемпе тупăшса иккĕмĕш вырăнсене çĕнсе илнĕ. Инçе çултан çитĕнỹпе таврăннă Астрахань облаçĕнче иртнĕ Пĕтĕм Раççейри ХIII Сабантуй та çитĕнỹсемпе савăнтарнă. Патăрьелĕнчи ачасемпе çамрăксен спорт шкулĕпе ФСК "Паттăр" воспитанникĕсем унта чыса тивĕçнĕ. 60 килограмлă виçерисемпе корэш енĕпе Сабир Асейнов пĕрремĕш, 80 килограмлисемпе кĕрешсе Булат Тумаков иккĕмĕш вырăнсене çĕнсе илнĕ. Çамрăксемшĕн Эльфис Мтиев тренерăн та савăнмалăх пур. Çĕнтерỹçĕсем - Патăрьелсем Патăрьелĕнчи "Паттăр" стадионта Пĕтĕм Раççейри "Сăран мечĕк" ăмăртăвăн республика шайĕнчи çамрăк футболистсен ăмăртăвĕ иртнĕ. Унта 2008-2009 çулсенче çуралнă ачасем хутшăннă. Ăмăртура Патăрьел, Елчĕк, Комсомольски округĕсен командисем тĕл пулнă. Елчĕксем Комсомольскисенчен 2:1 шутпа выляса илнĕ. Патăрьелсем Елчĕксене 3:1 шутпа çĕнтернĕ, Комсомольски командине 6:0 шутпа парăнтарнă. Çапла вара Патăрьелсем вăйă çĕнтерỹçисем пулнă. Иккĕмĕш вырăна Елчĕксем тухнă. Икĕ командăн та тепĕр этапри тупăшусене хутшăнмалла пулать.