Патăрьел муниципалитет округĕн центрĕнче Кепе юхан шывĕ урлă виçĕ çĕртен каçма пулать. Аслă çулпа автотранспорт çỹрет. Ытти иккĕшĕ вара çуран утакансене валли. Патăрьел территори пайĕн администрацийĕ çывăхĕнчипе халăх куллен йышлă каçса çỹрет. Çут çанталăк илемĕпе киленме те кăмăллă кунта. Кĕпер айĕпе шыв юхать. Йывăç-курăк ỹсет. Кайăксем юрлаççĕ. Çак илеме тытса тăни те савăнтарать. Темиçе çул каярах Валентина Ягудина кĕпертен Канаш урамне тухакан çул хĕррине чечексем лартса хăварнă. Çуркунне вĕсене хăрнă çулçисенчен тасатман. Ỹркенмерĕ кĕмĕл çỹçлĕ волонтер. Пĕчченех чечексене тасатса тирпейлерĕ. Курăкне территори пайĕн ĕçченĕ çулса пачĕ.

Валентина Ивановна пĕр çакăнти тирпейшĕн çеç тăрăшмасть. Ĕлĕкхи çăкăр лавкки умĕнчи, уйрăм çынсем суту-илỹ тăвакан лаптăка та тасатма мехел çитерет.

- Ачаранах хăнăхнă тирпее. 26 çул Патăрьелĕнчи "Центральнăй" ача садĕнче медицина сестри пулса ĕçленĕ май çитĕнекен ăрăва та çапла пулма сĕннĕ. Мороженнăй е канĕхвет хутне мĕншĕн утса пынă çĕре пăрахмалла? Çỹп-çап пухăнмашкăн хунă ятарлă ешчĕксем кашни çĕртех пур,- тет Валентина Ягудина.

Кĕпер çывăхĕнчи тирпее кам тунине кашнийĕ пĕлмесен те пултарать. Çавах унтан иртен-çỹрен çеçке çуракан чечексем илем кỹрсе ỹснине куратех.

Альбина ИВАНОВА