ПАТĂРЬЕЛ муниципалитет округĕнчи Общество палатин хастарĕсем хăйсен ĕçне пур енлĕ йĕркелеççĕ. Акă, çак кунсенче палата канашĕ (унта регламентпа килĕшỹллĕн Анатолий Самакин председатель тата икĕ çумĕ кĕреççĕ) ларăвĕнче организациллĕ хăш-пĕр ыйтăва пухса тухнă, вăл шутра ачасен çуллахи канăвне мĕнле йĕркеленине те тишкернĕ. Ларура округри вĕрентỹ управленийĕн начальникĕ Ирина Рубцова вĕренекенсен çуллахи кану тапхăрне мĕнле йĕркеленипе паллаштарнă, ыйтусене хуравланă. Çавăн пекех Общество палатин хастарĕсем Кзыл Чишмари çамрăксен "Сэлэт батыр" общество центрне çитсе курнă. Кунта эрне ытла ĕнтĕ çĕршывăн тĕрлĕ кĕтесĕнчен, вăл шутра хамăр округран килнĕ 104 ача лагерьте сывлăхне çирĕплетет, ăс-тăнне аталантарать, хул-çурăмне тĕреклетет. Кун валли центрта услови çителĕклĕ. Занятисенче ачасем программировани, промышленность дизайнĕ, робот техники тата ытти предметсене те вĕренеççĕ. Çуллахи каникул вăхăтĕнче кунта тăватă ушкăн пулмалла. Палата членĕсем ачасен канăвне çỹллĕ шайра йĕркеленине палăртнă.