Июнĕн 11-мĕшĕнче Акатуй-Сабантуй пуçланас умĕн, Патăрьелĕнче Решит Санзяпов фермерăн "Тутлă тата усăллă" суту-илỹ çуртĕнчи "Фермер картишĕ" сыр пĕçерсе сутакан лавкка алăкĕсене туянакансем валли уçнă. Савăнăçлă мероприятие Патăрьел муниципалитет округĕн пуçлăхĕ Рудольф Селиванов, РФ Патшалăх Думин депутачĕ Анатолий Аксаков, ЧР Министрсен Кабинечĕн Председателĕн çумĕ - экономика аталанăвĕн тата пурлăх хутшăнăвĕн министрĕ Дмитрий Краснов, ЧР Патшалăх Канашĕн депутачĕсем Валерий Антонов, Сергей Семенов, Николай Степанов хутшăннă.

Сыр хатĕрлекен объекта 2022 çулта тума пуçăннă. Вăл 14 млн тенке ларнă. 10 млн тенкине грант шучĕпе панă. Кунта çулталăкне 20 тонна сыр хатĕрлеме палăртаççĕ.

Решит Санзяпов фермер хуçалăхĕнче ỹсен-тăран, выльăх-чĕрлĕх отраслĕсем лайăх аталанса пыраççĕ, çавăн пекех туса илнĕ продукцие вырăнтах тирпейлессипе ăнăçлă ĕçлекен хуçалăхсенчен пĕри. Кунта аш-какая та, сĕте те хатĕр продукци туса сутаççĕ.

(Хамăр корр.)