Акатуй-Сабантуй спорт мероприятийĕсенчен кăçал та пуян пулчĕ, аренăсем пĕрре те пушă тăмарĕç. Юхмапа Пăла тăрăхĕнче пурăнакансем кăна мар, ют муниципалитет округĕнчен килнисем те тупăшрĕç, хăйсен вăйĕсене виçрĕç.

Кĕрешекенсем патĕнче çын туллиехчĕ. Мат çине вăй виçме тухакансене вĕсем шăхăрса та, кăшкăрса та хавхалантарчĕç. Ăмăрту та питĕ хĕрỹ иртрĕ. Тĕреклĕ каччăсемпе арçынсем пĕр-пĕрне ниепле те парăнасшăн пулмарĕç. Чăваш наци кĕрешĕвĕпе Эльфис Мтеев, Чернов мала тухрĕç. Ирĕклĕ майпа кĕрешекенсенчен Ринас Садаров, Дмитрий Албуткин, Роман Николаев, Илназ Субханкуллов чи вăйлисем пулчĕç.

"Корэш" мелĕпе 40 килограмм виçеллисенчен Ильдан Шршана (Шăнкăртам) çĕнтерекен пулмарĕ. Ильшат Купкенов (Шăнкăртам), Айдар Чебенов (Хирти Пикшик), Ринас Садаров, Ранис Кардонов, Ильнар Карама, Илназ Кеметов (Шăнкăртам) хăйсен виçе категорийĕсемпе пьедесталăн чи çỹллĕ картлашки çине тăчĕç.

 Кăçал абсолютлă чемпион ятне Ринас Садаров, Альфис Мтеев, çамрăксенчен Булат Тумаков тивĕçрĕç.

Акатуйра масс-рестлинг ăмăртăвĕ те иртрĕ. Вăл çĕннисенчен пĕри. Иккĕн хире-хирĕç ларса ятарлă патакка кашнийĕ хăй еннелле туртса илессишĕн тăрăшрĕç. Арçынсенчен Тутар Сăкăтĕнчи Марат Гафарова, хĕрарăмсенчен Патăрьелĕнчи Валентина Метровăна парăнтаракан пулмарĕ. Хĕрсенчен 60 килограмлă виçене çитменнисенчен Анастасия Ильина, 60 килограмм ытларах таяканнисенчен Туçа территори уйрăмĕнчи Ольга Плечова чи маттури пулчĕç. Каччăсенчен 55 килограмм таяканнисенчен Иван Шейко, 65 килограмран сахал виçеллисенчен Аяз Хисамутдинов, 65 килограмран пысăкраххисенчен Нияз Шакуров палăрчĕç.

Алă вăйне виçекенсем те нумайăн пулчĕç. Малти вырăнсене Мария Андреева, Гелуся Камалетдинова, Ишмуратова, Валентина Петрова, Андрей Осипов, Азат Якупов, Велиуллов, Гафаров йышăнчĕç.

Кире пуканĕ йăтассипе кашни ăру интересленет. Спорт ветеранĕсем те хастар хутшăнаççĕ. 16 килограмлă кире пуканне хĕрсенчен чи нумай йăтаканни Туçа хĕрĕ Карина Плечова пулчĕ. Арçынсенчен 24 килограмлă кире пуканне йăтассипе Николай Васильев (Кĕçĕн Чемен), Борис Глинкин, ветерансенчен Тутар Сăкăтĕнчи Тойфик Валеев мала тухрĕç.

 Шашка-шахмат вăййине юратакансем те хăйсен ăсталăхне уявра кăтартрĕç. Чи-чи тавçăруллисем Тикешри В. Антонов тата тата Канашран килнĕ А. Николаев пулчĕç.

Ачасем старта тăрсан кашнийĕ вĕсене хавхалантарма тăрăшать. Вĕренекенсем çăмăл атлетикăна юратни те сисĕнет, чупнă чухне ури тупанĕсем çĕре перĕнмеççĕ тейĕн. Вĕренỹ учрежденийĕсенчен эстафетăра Первомайскинчи Митта Ваçлейĕ ячĕпе хисепленекен пĕлỹ çуртĕнче ăс пухакансем ăнăçлă чупрĕç. Патăрьелĕнчи пĕрремĕш вăтам шкул - иккĕмĕш, Аслă Чементи виççĕмĕш вырăнсене йышăнчĕç.

Ветерансенчен çăмăл атлетикăра Хурама Тварти Терентий Давыдова çитекен пулмарĕ.

Акатуй-Сабантуя килнисем велосипедпа ярăнакансен ăмăртăвне те пăхса савăнчĕç. 2016 çулта тата каярах çуралнă арçын ачасенчен 400 метрлă дистанцире Патăрьелĕнчи Сабиль Салихов, хĕр ачасенчен Шăнкăртамри Самина Мухаметзянова финиша пĕрремĕш кĕчĕç. Çавăн пекех хĕрсемпе каччăсенчен велочупура Таисия Кудявцева (Турхан), Матвей Антонов (Турхан), Елизавета Иванова (Нăрваш Шăхаль), Андрей Сулагаев (Патăрьел), Степан Едифанов (Нăрваш Шăхаль), Самира Салихова, Карим Камалдинов, Карина Антонова (Патăрьел) ăнăçлă ăмăртрĕç.

Уявра штанга йăтакансен, канат туртакансен тупăшăвне, волейбол вăййине пăхма кăсăклă пулчĕ.

Акатуй-Сабантуя нумайăшĕ ятарласа лашасем чупнине курма килет. Ватти-вĕттине интересленет унпа. Урхамахĕсем вара чăннипех те пĕринчен тепри маттур, пăхса ытармалла мар. Кăçал Шăмăршăран килнĕ Олег Хлюкин тытса пыракан Ворчун урхамах мала тухрĕ.

 Ольга ПАВЛОВА