Эрнекун Патăрьелĕнчи культурăпа кану центрĕнче медицина ĕçченĕсем хăйсен професси уявне паллă турĕç. Çак ятпа шурă халатлисене, ветерансене видеопа ЧР Министрсен Кабинечĕн Председателĕн çумĕ, сывлăх сыхлавĕн министрĕ Владимир Степанов, Патăрьел муниципалитет округĕн пуçлăхĕн çумĕ, финанс пайĕн начальникĕ Светлана Чернова, муниципалитет округĕн депутачĕсен Пухăвĕн председателĕ, тĕп больница врачĕ Николай Тинюков, медицина ĕçченĕсен профсоюз организацийĕн председателĕ Антонина Чернова саламларĕç.

Николай Антонович врачсемпе медицина сестрисене кăнтăрла та, çĕрле те çынсен сывлăхĕшĕн ырми-канма тăрăшса ĕçленĕшĕн, пациентсен ыратăвне мала хунăшăн тав турĕ. Иртнĕ çулхи ĕçсене пĕтĕмлетрĕ, малашлăх тĕллевĕсене палăртрĕ.

- Пирĕн коллективăн тĕп пуянлăхĕ - хăйсен ĕçне, профессие чунтан парăннă çынсем. Вĕсен ĕç ăсталăхĕпе яваплăхĕ умма лартнă кăткăс ыйтусене те татса пама пулăшать,- терĕ вăл шур халатлисене саламланă май.

Видеопа слайдсем кăтартса пыни сиплев ĕç-хĕлне анлăн çутатма май пачĕ.

Шурă халатлисем - врачсем, медицина сестрисемпе фельдшерсем, водительсем тата çак сферăри ытти çынсем тĕрлĕ шайри Хисеп хучĕсемпе Тав çырăвĕсене тивĕçрĕç.

 Çавăн пекех йăлана кĕнĕ тăрăх çак кун çулленех конкурс пĕтĕмлетĕвне тăваççĕ. "Чи лайăх пĕтĕмĕшле практика врачĕ" ята Шăнкăртамри Гульнара Ишмуратова, "Чи лайăх врач амбулаторийĕ" ята Шăнкăртамри врач амбулаторийĕ, "Чи лайăх сиплев уйрăмĕ" ята гинекологи уйрăмĕ (заведующийĕНаталия Амуткина акушер-гинеколог), "Поликлиникăн чи лайăх кабинечĕ" ята психиатр-нарколог кабинечĕ (Надежда Надина), "Чи лайăх фельдшерпа акушер пункчĕ" ята Шăхачри фельдшерпа акушер пункчĕ (заведующийĕ Галина Игнатьева) тивĕçнĕ. Вĕсене те чысларĕç.

Культурăпа кану центрĕн ĕçченĕсем уяв сĕмне савăк юрă-ташăпа çĕклерĕç.

Альбина АСТРАХАНЦЕВА