ПУРНĂÇРА кирек кам та сывлăх тĕлĕшĕнчен тĕрлĕрен сăлтавпа йывăрлăха кĕрсе ỹкме, аварире суранланма (Турă сиртĕрех ун пек инкекрен) пултарать. Ун пек чухне çынна юн парса пулăшни питĕ кирлĕ. Çакнашкал лару-тăрура донорсен пархатарлă та сăваплă ĕçĕ пысăк пĕлтерĕшлĕ. Хальхи вăхăтра Чăваш Республикипе 4,4 пин хисеплĕ донор шутланать. Вĕсем пурте 40 е тата ытларах хутчен юн панăскерсем. Çын пурнăçне çăлас тĕллевпе кар тăракансем Юхмапа Пăла тăрăхĕнче те сахал мар. Патăрьелĕнчи тĕп больницăри врач-трансфузиолог Ольга Зубова хаçат редакцине пĕлтернĕ тăрăх, хальхи вăхăтра "Хисеплĕ донор" ята тивĕçнисем 30ăн. Вĕсенчен улттăшĕ - медицина ĕçченĕсем. Ольга Владимировна çак пархатарлă тивĕçе çынсем пысăк хастарлăхпа, ăнланулăхпа хутшăннине, муниципалитет округĕнче йĕркелекен Донор кунĕсенче юн парас текенсем яланах йышлă пулнине палăртрĕ.