Мускав хулин регионсем хушшинчи çыхăнупа наци политикин департаменчĕ, Чăваш Республикин Правительстви тата Чăваш наципе культура автономийĕ пулăшнипе июлĕн 1-мĕшĕнче Мускавра Сокольники паркĕнче Пĕтĕм чăваш Акатуйĕ иртет.

Çавна май çĕршывăн тĕп хулинче пурăнакансемпе хăнасене хăйне евĕрлĕ программа тата чылай тĕлĕнтермĕш, парнесем кĕтеççĕ.

 Наци уйрăмлĕхĕсене культурăн авалхи йăли-йĕркипе, ỹне- рĕпе, спортпа, паха апат-çимĕçпе, аграри ĕçĕпе, тараватлăхпа çыхăнтарса сăнлаççĕ.

Акатуй - чăваш халăхĕн чи пĕлтерĕшлĕ уявĕ. Пархатарлă çак йăла-йĕрке тăван çĕре юратма, ял хуçалăх ĕçченĕсен çăмăл мар ĕçне хисеплеме вĕрентет. "Ака" сев сăмахпа тỹр килет, "туй" - свадьба. Символ пĕлтерĕшлĕ туйăн тĕп геройĕсем - суха пуç тата çĕр.

Чăвашсем мĕн авалтан çу çитнине палăртса пĕр-пĕрне саламлама, вăйă картине тăрса юрăсем шăрантарма, спорт ăмăртăвĕсем - кĕрешỹ, чупу, халăх вăййи-кулли - ирттерме пуçтарăннă. Акатуй кунне сăра вĕретнĕ, шỹрпе пĕçернĕ.

Мускавра иртекен "Акатуй-2023" фестиваль çак йăла-йĕркене упрама тăрăшать. Чăваш тараватлăхне кăтартакан уяв тĕрлĕ наци çыннине туслаштарать.

Акатуя 11 сехетре савăнăçлă лару-тăрура уçаççĕ. Унта хутшăнакан хăнасене йăлана кĕнĕ лапамсем тата тĕлĕнтермĕшсем кĕтеççĕ.

Тĕп сцена çинче нон-стоп майпа наци коллективĕсем, эстрада çăлтăрĕсем,Чăваш Ен, Мускав тата ытти регионти коллективсем юрă-кĕвĕ шăрантарĕç. Уява хутшăнакансем чăваш ташши флешмобне, ăсталăх класĕсене хутшăнма, йăла-йĕрке уçланкинче уçăлса çỹреме пултараççĕ.

Культура тата йăла-йĕрке историйĕсен пуянлăхĕ, вĕсене арт-площадкăсенче пурнăçа кĕртни тараватлăха сăнлать, чăваш чунне уçса парать. Çавăн пекех иртнĕ пурнăçпа, паянхи кунпа тата регион пуласлăхĕпе паллашма май парать.

Александр ИЛЬИН