Чăваш патшалăх çамрăксен театрĕнче  Медицина ĕçченĕсен кунĕ ячĕпе уяв иртрĕ. Шурă халатлă професси çыннисене сумлă лару-тăрура Чăваш Республикин Пуçлăхĕ Олег Николаев, ЧР Министрсен Кабинечĕн Председателĕн çумĕ, сывлăх сыхлавĕн министрĕ Владимир Степанов, Чăваш Республикин Патшалăх Канашĕн Председателĕн тивĕçĕсене пурнăçлакан Ольга Петрова, Раççейри пенси тата социаллă страховани фончĕн Чăваш Енри уйрăмĕн управляющийĕ Валерий Николаев тата ытти хăнасем саламларĕç.

Олег Николаев регион аталанăвне сывлăх сыхлавĕн медицина ĕçченĕсем тивĕçлĕ тỹпе хывнине палăртрĕ, хăйсен пурнăçне çынсен сывлăхне сыхлас ĕçĕпе çыхăнтарнисене тав турĕ.

Владимир Степанов сывлăх сыхлавçисем коронавирус инфекцине çине тăрса çĕнтернине палăртрĕ. Паян Раççей умĕнче тепĕр чĕнỹ - Украинăри ятарлă çар операцийĕ тăнине каларĕ. Малашлăх тĕллевĕсене палăртрĕ.

Республикăри медицина отраслĕнче 17 пин ытла çын вăй хурать. Вĕсен тăрăшулăхне пула çынсен пурăнас кун-çулĕ вăрăмланать. Уявра тивĕçлипе хакларĕç шурă халатлисен ĕçне. Чыса вара Юхмапа Пăла тăрăхĕн ĕçченĕсем те тивĕçрĕç. Район больницин тĕп врачне Николай Тинюкова РФ "сывлăх сыхлавĕн отличникĕ" паллăпа, Антонина Чернова врач-инфекциониста "Чăваш Республикин тава тивĕçлĕ тухтăрĕ" ятпа чысларĕç.

 Çак сферăра Николай Антонович 1985 çултанпа ĕçлет. Вĕсенчен çирĕмĕшне - тĕп врачра.

Антонина Валерьевна вара районти тĕп больницăна 1998 çулта килнĕ. Тухтăр пулма ачаранах ĕмĕтленнине калать.

- Ĕçĕм килĕшет. Ăна юратни кăмăла çĕклет. Коронавируспа çине тăрса кĕрешрĕмĕр. Хамăр та чирлерĕмĕр. Çавах çынсен сывлăхне упраса хăвартăмăр. Çакăнтан хакли пирĕншĕн урăх çук. Хамăн çитĕнỹре коллектив ăнланăвне, пулăшăвне туятăп. Пĕрле кирек хăш ĕмĕт-тĕллеве те пурнăçлама пулатех,- тет Антонина Чернова.

Професси ăстисене тата та чысларĕç уявра.

 Çавăн пекех массăллă информаци хатĕрĕсенче медицина темине çутатакансене те палăртмасăр хăвармарĕç. "Авангард" хаçатра тăрăшакан Альбина Астраханцева редактор вара "Волонтер-медиксен ĕçне тимлĕх уйăрнăшăн" номинацире çĕнтернĕшĕн диплома тивĕçрĕ.

Хаклав

Антонина САНДЫРКИНА, шăл тухтăрĕ:

 - Пĕрле тăрăшакансен ĕçне вырăна хурса хаклани савăнтарать. Тивĕçлĕ вĕсем. Тата та пысăкрах ỹсĕмсем туччăр. Çамрăксем вĕсенчен тĕслĕх илсе пыччăр.

Альбина КАПИТОНОВА