Июнĕн 22-мĕшĕнче 82 çул каялла фашистла Германи Совет Союзне тапăнса кĕнĕ. Астăвăмпа хурлану кунĕнче Патăрьелĕнчи Мухтав монуменчĕ умĕнче митинг иртрĕ.

 Унта Патăрьел муниципалитет округĕн пуçлăхĕ Рудольф Селиванов, Патăрьел тата Шăмăршă районĕсен çар комиссарĕ Вячеслав Илюткин, Раççей Федерацийĕн Хĕç-пăшаллă вăйсен ветеранĕсен Патăрьел округĕнчи канашĕн председателĕ Сергей Шадиряков, Шалти ĕçсен министерствин "Батыревский" уйрăмĕн начальникĕ Андрей Ларьков тата организаци-предприяти коллективĕсем хутшăнчĕç.

Тăватă çула тăсăлнă Тăван çĕршывăн Аслă вăрçи кашни киле тенĕ пекех кĕрсе тухнă, чылайăшĕн чĕринче нихăçан пирчеми суран тăратса хăварнă. Патăрьел муниципалитет округĕн пуçлăхĕ Рудольф Селиванов сăмах илнĕ май Юхмапа Пăла тăрăхĕнчен нимĕç фашисчĕсене хирĕç кĕрешме 8377 çын тухса кайнине, вĕсенчен 6034-шĕ юнлă вăрçă хирĕнче куçне хупнине каларĕ. Паян та тăшман пуçне тăратма пăхать, çавна май Раççейĕн паттăр çыннисен татах аллине пăшал тытма тивет. Украинăри ятарлă çар операцине хутшăнакансем хальхи вăхăтра мирлĕ тỹ- пешĕн, асатте-кукаçи тунă çĕнтерĕве упраса хăварассишĕн тăрăшаççĕ. Рудольф Васильевич çавăн пекех çитĕнекен ăрăва мĕн пĕчĕкрен Тăван çĕршыва юратма вĕрентмеллине, патриотлăх туйăмне аталантармаллине каларĕ.

Митинга хутшăнакансем пуç хунă ентешĕмĕрсене асăнса шăп тăрса хисеп тунă хыççăн Мухтав монуменчĕ умĕнчи ĕмĕрлĕх хĕлхем умне чечексем хучĕç.

 Патăрьелĕнчи централизациленĕ клуб системин ĕçченĕсем вăрçă паттăрĕсене халалласа чуна пырса тивекен юрăсем шăрантарчĕç.

 Ольга БЕЛЬДЕКОВА