Патăрьел муниципалитет округĕн пуçлăхĕ Рудольф Селиванов район прокурорĕ Андрей Афанасьев, Раççей шалти ĕçсен министерствин "Батыревский" уйрăмĕн начальникĕн çумĕ Алексей Быков полици подполковникĕ, Роспотребнадзор управленийĕн Чăваш Республикинчи Патăрьел муниципалитет округĕнчи территори уйрăмĕн начальникĕн тивĕçĕсене пурнăçлакан Светлана Петрянкина тата ытти яваплă ĕçченсем хутшăннипе çурт-йĕрти каяшсене санкцилемен вырăнсене тăкассине пĕтерессипе тата тавралăха упрассипе, сыхлассипе канашлу ирттернĕ.

Йăлари шĕвек каяшсене турттаракансем чылай чухне пичкери тасамара палăртнă вырăна илсе çитермесĕрех ăçта килнĕ унта тăкса хăвараççĕ, çакă çынсен сывлăхĕшĕн те хăрушлăх кăларать, шыва варалать. Сăмах май, ку ыйту паян республикăра та çивĕччисенчен пĕри. Канашлăва хутшăнакансем йĕркене пăсакансене штрафсем панине те пĕлтернĕ, анчах тупăшĕ тăкакран чылай пысăкрах пулнăран тивĕçлĕ йышăну тумаççĕ.

- Йĕркене пăсакансемпе пирĕн пĕрлехи вăйпа кĕрешмелле, ачасен пуласлăхĕшĕн тăрăшмалла, - тенĕ округ пуçлăхĕ Рудольф Селиванов канашлăва пĕтĕмлетнĕ май.

 (Хамăр корр.)